Тывада эң эки турисчи маршрут дээш муниципалдар аразында мөөрей эгелээн. Республиканың Чазаа мөөрейниң негелделерин бодунуң доктаалы-биле бадылап, Даштыкы экономиктиг харылзаалар база туризм яамызын организатору кылдыр томуйлаан.
Мөөрейниң сорулгазы – Тываның чараш бойдус чурумалын, төөгү болгаш культура өнчү-байлаан хөйге-чарга тайылбырлап, долгандыр хүрээлелге хумагалыг хамаарылганы кижизидип, ол ышкаш муниципалдыг тургузугнуң турисчи кокпаларын хөгжүдүп сайзырадыры болур. Кожуун чагыргаларын база республикада турисчи агентилелдерни мөөрейже чалаан.
Мөөрейниң киржикчилери бодунуң кожуунунда азы суурунда турисчи маршруттуң төлевилелин Power Point программаның дузазы-биле слайдыларга көргүспүшаан, делгереңгей тайылбырлап, ону организастаарының чарыгдалдар санаашкынын киирер.
Комиссия мөөрей киржикчилериниң төлевилелдерин элээн каш хевирлерге шылгаар: турисчи продукт болур маршруттуң чугулазы, төлевилелдиң онзагайы, логистиканың таарымчалыы, коммерцияга ажыглаарының айыыл чогу база келир үеде кедизи. Конкурс материалын aves_rt@mail.ru электроннуг почтаже чорудар.
Сентябрьның 27-де – Бүгү-делегейниң Туризм хүнүнде мөөрейниң түңнелин үндүрүп, тиилекчилерни шаңнаар. Бирги чер алган төлевилелге 100 муң, ийигизинге – 80 муң, үшкүзүнге – 60 муң рубль түңнүг акша шаңналдарын тыпсыр. Мөөрейниң шупту лауреаттарынга төлевилелиниң өртээниң 50 хуузунга субсидияны база бээр.
#Туризм #Турисчимаршрут #Мөөрей #Шынсолун #Тыва #Тывамедээ #Тывадыл #Тува #Tuva #TMG #Tuvanews