Найысылал Кызылдың Эне-Сай эриинде, «Азия төвү» скульптурлуг комплекстен ырак эвесте, тускай шериг операциязының киржикчилеринге мемориалдыг комплексти тургускан. 6 метр бедик тураскаалда Ада-чуртун камгалап турар ийи дайынчыны база эмчи сестразы, аныяк кысты шуткуп кылган. Тураскаалдан ырак эвесте ТШО-га бажын салган маадырларывыстың аттарын сиилбээн стелаларны база тургускан.
Бөгүн, ноябрь 8-те, комплекстиг тураскаалдың байырлыг ажыдыышкыны болган. Бо хүннү ёзулуг-ла шериг операциязының киржикчилеринге ханы хүндүткелдиң, тураскаалдың болгаш чоргааралдың хүнү болган деп болур. Ажыдыышкынга Украинада чорудуп турары тускай шериг операциязының дайынчы хөделиишкиннеринге оолдарын база чоок кижилерин чидирген ажыг-шүжүглүг кижилер хөйү-биле келген.
«Мында оюп бижээн ат бүрүзү дээрге-ле, бистиң катай өскен база чанывыска чурттап чораан чаңгыс чер чурттугларывыстың салымы-дыр. Ол дээрге эглип кээр бис деп сөзүн берген адалар-дыр, амыдыралын чаа-ла эгелеп чоруур аныяк оолдар-дыр. Олар шаңнал-мактал дээш-даа эвес, ажы-төлүнүң келир үези дээш, боттарының аал-оранын, өг-бүлезин камгалаар дээш айыылче уткуй чорупканнар. Бистиң кырывыска тайбың дээр турзун дээш, бистиң хоорай-суурларывыс тайбың-дыштыг чурттазын дээш амы-тынын бергеннер» — деп, Тываның Баштыңы Владислав Ховалыг байырлыг ажыдыышкын үезинде чугаалаан.
(Бо дугайында тодаргай чүүлдү «Шын» солуннуң дараазында үндүрүлгезинден номчуур силер).
Чуруктарны ТР-ниң парлалга албанындан алган база авторнуң тырттырган чуруктары.
