Москвага Тываның Баштыңы Владислав Ховалыг «Россети» бөлүүнүң чиңгине директору Андрей Рюмин-биле ужурашкан. Республика девискээринде системаны тургускан четки организациязы болгаш бүзүрелдиг электри энергиязын хандырар харыысалгалыг чаңгыс аай төвү болур «Россеть Сибирь Тываэнерго» компанияның ажылынче база регионнуң энергетика комплекизиниң хөгжүлдезинче кол кичээнгейни угландырган.
«Россеть» бөлүүнүң удуртулгазы-биле ужуражылгада Тывага энергетика-биле хандырылганың комплекстиг планын боттандырарының кол угланыышкыннарын чугаалашкан. «Россеть Сибирь Тываэнерго» компанияга дамчыткан электри четкилерин чаартыр талазы-биле хемчеглерниң чоруп турарынче онза кичээнгейни угландырган. «Россеть» компаниязы Тывага энергетика хандырылгазының комплекстиг планының күүселдези-биле элээн каш стратегтиг төлевилелдерни доозуп турарын Андрей Рюмин демдеглээн.
«Ылаңгыя, Саян-Шушенск ГЭС-тен электри энергиязын дамчыдарынга киржип, Тываны хандырган энергетика дээрбээниң составында кирип турар 500 кВ күчүлүг «Означенное» подстанцияның трансформатор күчү-күжүн улгаттырарының дугайында чугааны чоруткан – деп, Владислав Ховалыг чугааның түңнелин дыңнаткан.– Бурунгаар сорулгаларның аразында “Шушенская-опорная – Туран – Кызылская” 220 кВ транзит шугумунуң күчү-күжүн чаа электри шугумнарын тутпушаан, улгаттырары көрдүнген. Төлевилелде бистиң республиканың төп болгаш чөөн кожууннарын чырык-биле хандырып турар 220 кВ Туран подстанциязының эде чаартылгазы кирген».
Энергетика четкизиниң компаниязының мурнады көөр сорулгазы – Ак-Сугнуң чес чыдынында даг-тывыш бүдүрүлгезин четкиге кожуп, Кызылдың болгаш ол чоок-кавы кожууннарның электри хандырылгазын экижидеринче угланган төлевилелдерни боттандырары. Тываның Баштыңы бо хемчеглер Тываның энергетика системазының бүзүрелдиг чоруун элээн бедидеринче, регионнуң социал-экономиктиг турум хөгжүлдезинге байдалдарны тургузарынче база чаа инвестицияларны хаара тударынче угланган дээрзин демдеглээн. Владислав Ховалыг ооң мурнунда Тываның Дээди Хуралынга Айыткалында чоннуң амыдырал-чуртталгазының шынарының көргүзүглериниң бирээзи энергия хандырылгазының бүзүрелдиг болгаш чедингир болурунуң чугулазын онзалап демдеглээн болгаш «Россеть» бөлүүнүң удуртулгазынга деткимчези дээш четтиргенин илереткен.
ТР-ниң Чазааның парлалга албаны.
Чурукту интернет четкизинден хоолгалаан.
«Шын» №9 2025 чылдың март 13