Тываның Баштыңы Владислав Ховалыг Петербургтуң делегей чергелиг экономиктиг шуулганының доозулганын бодунуң социал четкилеринге дыңнаткан.
"Бистиң делегациявыс дискуссияларга киришкен, ажыл-агыйжы ужуражылгаларны кылган, мооң мурнунда дыңнадып турганывыс дугуржулгаларга аттар салдынган.
«Россети» акционерлиг ниитилелдиң генералдыг директору Андрей Рюмин болгаш ооң оралакчызы-биле республиканың энергия хандырылгазының айтырыгларын чугаалашканывыс ужуражылганы аңгы демдеглексээр-дир мен. Тыва Республиканың девискээринде үлетпүр болгаш социал адырларда төлевилелдерни чырык, энергия-биле хандырар дугайында эрткен чылдың төнчүзүнде бадылаттынган планны боттандырары-биле электри шугумунуң төлевилелин ажылдап кылып эгелээнин Андрей Валерьевич дамчыткан. Тожу кожуунда Ак-Сугга чедир чазаглыг орукту электри шугумунуң таварып эртер аргаларын сайгарып көргенин болгаш Кызылда подстанцияны 220 кВТ болур кылдыр эде кылыры көрдүнгенин чугаалаан.
Ужуражылга үезинде Мөңгүн-Тайгага болгаш Тере-Хөл кожуунда Кунгуртуг суурга чедир электри линияларының тудуунга хамаарышкан айтырыгны база сайгарып чугаалаштывыс" - деп В. Ховалыг медеглээн.