«Туризм болгаш хүндүлээчел чоруктуң индустриязы» деп национал төлевилелдиң чорудуу-биле Тыва Республика турисчи маршруттарны сайзырадыр дээш, Кыдаттан аалчыларны хаара тудуп турар дээрзин регионнуң туризм талазы-биле агентилели дыңнаткан.
Июль 25-те Тывага Кыдат Улус Республиканың Синьцзян-Уйгур автономнуг районнуң Улусчу Чазаандан турисчи делегация келген. Кыдат аалчылар Кызыл кожуунда «Алдын-Булак» этно-культурлуг комплексти, Тожу кожуунда сураглыг Азас хөлдү көөр аргалыг болганнар. Ол ышкаш Таңды кожууннуң Дус-Хөлге база четкеннер. Аңаа ол хөлдүң эм шынарының дугайында таныштырылга болган.
Аян-чоруктуң түңнелинде Тыва Республиканың болгаш КУР-нуң Синьцзян-Уйгур автономнуг районнуң садыг-үлетпүр палаталарының аразынга транспорт кызыгаар садыглаашкынын калбартырының дугайында дугуржулгага атты салган.
«Регионнуң хөгжүлдезиниң айтырыглары, ооң экономиктиг стратегиязын чорудары, инфраструктуралыг төлевилелдерниң боттанылгазы Россия биле Кыдаттың аразында чаа транспорт кориродун тургузар стратегияга таарымчалыг»— деп, туризм талазы-биле агентилелдиң специалистери демдеглеп турар.
«Туризм болгаш хүндүлээчел чоруктуң индустриязы» деп национал төлевилел Россия иштинге аян-чоруктарның санын 2030 чылга чедир 140 млн чедир көвүдедир сорулгалыг, . Россияга аян-чорукту эптиг, айыыл чок болгаш солун кылдыр кылырынга бо төлевилел дузалаар.
Бистиң корр.
"Шын" №59, 2023 чылдың август 9
Эптиг, айыыл чок болгаш солун
9 августа 2023
48