Эрзин кожууннуң Бай-Даг сумузунда «Бай-Хөл» агрокооперативтиң коллективи мал ажылын кылып чоруур дыка кызымак аныяктар. «Бай-Хөлдүң» малчыннары бо кышты дыка-ла эки, хүр-менди ашканнар.
Агрокооперативтиң удуртукчузу Эртине Манзай, малчын эш-өөрү-биле чоокта чаа Читага болган уксаалыг малдар делгелгезинге киришкеш, улуг шаңналды алганын «Шын» солундан номчааш, дыка өөрдүм. Олар бо делгелгеде чаңгыс эвес удаа киришкеш, шаңналдыг черлерни ап келген. Бо «бай-хөлчүлерниң» ажы-ижи чедиишкинниг чоруп турар дээрге-ле, оларның кызымаккай ажыл-ижиниң түңнели-дир. Ол дээш чоргаарланыр бис.
Эрзин кожууннуң төлептиг оолдарының бирээзи Эртине Манзай мал ажыл-агыйында хөй чылдар иштинде үре-түңнелдиг ажылдап чоруурун билир мен. Ынчангаш моон-даа соңгаар ооң ажыл-ижинге улуг-улуг чедиишкиннерни күзедим.
/ Чечекмаа САДИ.
Эрзин кожуун, Мөрен суур.