Эр хиндиктиг бистиң хүлээлгевис-тир.

Кызылдың Төлээлекчилер Хуралының депутады Буян Биче-оол долу эвес мобилизацияга хамаарыштыр бодунуң бодалы-биле үлешкен:

- Россияның Президентизи Владимир Путинниң үндүрген Чарлыынга даянгаш, Россияның Камгалал яамызының сайыды, Армияның генералы Сергей Шойгунуң шак мындыг долу эвес мобилизацияны чорудар дээн шиитпиринден бистиң ойталаар эргевис чок. Бо мобилизация чарлаттынмаанда-ла, Тываның мурнундан хөй эки турачылар тускай шериг операциязында киржип турган, ам-даа киржип турарлар. Бо хүнге чедир аңаа шериг хүлээлгезин күүседип тургаш, чок болган дайынчыларның хөй кезии бистиң республикадан оолдар болуп турар. Ол хөй чидириглер дээш, бистиң шуптувустуң сагыжывыс аарып турар болгай. Амы-тынын харам чокка берип, тыва эр кижиниң маадырлыг ат-алдарын бедик тудуп шыдапкан, ам-даа түрлүг тудуп чорлар. Социал четкилерде тыва чоннуң кижи саны, ылаңгыя эр кижилер эвээш болганы-биле, долу эвес мобилизацияже моон улус чыырын кызыгаарлаар дугайында хөй медээлер үнүп турарын шупту номчуп, көрүп турар бис. Ийе, бир талазында, ону кичээнгейге ап болур-дур ийин. Өске талазында, Төрээн чурт айыылга таваржып келгенде, эр хиндиктиг чон шупту ону камгалаар дорт хүлээлгелиг бис. Бодум прапорщик эргелиг шериг албанын спортчу шериг кезээнге эрттирген мен. Бир эвес, меңээ келдириишкин кээр болза, боданмайн-даа чоруур апаар мен.