Июль 1-де Россияга дайынчы хөделиишкиннерниӊ хоочуннарыныӊ хүнүн демдеглеп турган.
Республиканыӊ найысылында Тиилелге шөлүнге сактыышкынныӊ байырлыг ёзулалы – митинг болган. Ада-чуртунга бараан болуп, дайынчы хүлээлгезин төлептиг күүсеткеннерниӊ эрес-дидим маадырлыг чоруун сактып, девискээр дайыныныӊ киржикчилериниӊ тураскаалынга боодал чечек салыр ёзулалды эрттирген.
Сактыышкын ёзулалынга республиканыӊ Чазааныӊ Даргазыныӊ оралакчызы Тимур Куулар, «Боевое братство» хөй-ниити организациязыныӊ регионалдыг салбырыныӊ кежигүннери, эрге-хоойлу камгалаар органнарныӊ ажылдакчылары, 55-ки мото-адыгжы(даг) бригаданыӊ шериглери, аныяктарныӊ патриотчу каттыжыышкыннарыныӊ төлээлери болгаш оларныӊ төрелдери, чоок кижилери киришкен.
Афганистанга, Чоокку Чөөн чүк чурттарынга болгаш өске-даа күрүнелерге мөчээн шериглерниӊ болгаш эки турачыларныӊ чырык овурун ыржым минута үезинде сактып мөгейген. Тыва Республикадан 500 ажыг кижи дайынчы даалга-биле даштыкы чурттарга демисежип турган.
Совет Эвилелиниӊ Афган республиканы хостаар хүлээлгезинге 400 ажыг интернационалчы-дайынчылар киржип турган. «Кызыл сылдыс» ордени-биле 10 кижи шаӊнаткан, оларныӊ үжүнге мөчээн соонда, орден тывыскан. «Эрес-дидим чоруу дээш» база «Дайынчы ачы-хавыяазы дээш» деп медальдар-биле 24 кижи шаӊнаткан, «Өөрүп четтирген афган чондан» деп медальды 300 ажыг шериглерге тывыскан.
Митингиге «Ада-чурт камгалакчылары» фондузунуӊ регионалдыг салбырыныӊ ажылдакчылары киржип турган. Тускай шериг операциязынга киржип, дайынчы хөделиишкиннерниӊ хоочуну деп эрге-байдалды алган шериглерге болгаш оларныӊ өг-бүлезинге, дайынчы хүлээлгезин күүседип турган мөчээн шериглерниӊ өг-бүлезинге социал деткимче чедирер дорт хүлээлгелиг күрүне фондузун РФ-тиӊ Президентизиниӊ даалгазы-биле тургускан.
Тыва Республиканыӊ Чазааныӊ медээзи-биле Р. Демчик белеткээн.