Тываның 10 маадыр санинструктор кыстары-биле эгин-кожа эл-хол болуп, кады дайынга демисежип чораан Севил Матпааевна Ооржак бистиң Чадаанавыстың маадырлыг өгбелериниң бирээзи.
Ол дайын мурнунда Москвага Чөөн чүк улустарының университедин дооскан. Күш-ажылчы базымын Таңды кожуунга эгелээн. Севил Матпааевна төрээн дылындан аңгыда, орус, хакас, алтай, моол дылдарны эки билир чораан.
Дайын эгелээрге, акы-дуңма орус чонга боттуг дуза чедирер күзелин илереткен. Эки турачы кылдыр чорударын чөпшээредип, беш катап өргүүдел бижээн. Харын-даа дайынчы танк кезээнге-даа баарынга беленин бадыткап, механиктерниң түр курузунга база өөренип турган.
Кайгамчык маадырлыг өгбевисти эки турачы кыстар, оолдар “угбавыс” дээш хүндүлээр чорааннар. Эрес-дидим дайынчы санитар Севил Ооржак аъттыг эскадроннуң дайынчылары – чаңгыс чер чурттугларының амы-тынын камгалаар, дүрген дуза чедирер дээш, бирги одуругга туруптар турган.
Тулчуушкун үезинде октар үзүктел чок ужуп турда, үңгеп-союп чорааш, балыгланган пулеметчу Саваар-оолду, салбыр командири Моңгуш Сундуйну эмчи пунктузунга чүктеп, сөөртүп эккелгеш, өлүмден камгалап алган.
Партийжи, нам кежигүнү коргуш чок Севил Матпааевна немец снайперлерниң огу будунче балыглаптарга-даа, дайзыннарга удур демиселин уламчылап, маадырлыг чоруун көргүскен. Ооң дидим, кашпагайын эскергеш, салбыр командиринге томуйлаан. Ол шериг хүлээлгезин тергиин эки күүседип, Дубно, Ровно хоорайларны болгаш оон-даа өске хоорай, суурларны хосташкан.
Ада-чурттуң Улуг дайынынга бистиң Чадаанадан чеди эки турачы киришкен. Оларның ийизи: Амаа Ооржак биле Севил Ооржак төрээн чер-чуртунуң, чонунуң чоргаар маадырлыг кыстары. Чүс-чүс дайынчыларның амы-тынын камгалап, эмнеп, санитар кезээнге шериг хүлээлгезин тулган эки күүсеткеннер.
Тыва санинструктор кыстарның буянныг ачы-дузазын дайын шөлүнге балыгланган аңгы-аңгы полктарның, дивизияларның дайынчылары боттарының командирлеринге чугаалап, өөрүп четтиргенин дамчыдарын дилеп турганнар.
Амгы салгал өгбелеривистиң кайгамчык маадырлыг чоруун магадап, хүндүлеп, үлегерлеп чоруурлар.
Севил Матпааевна – катаптаттынмас эрес-маадырлыг чоруу дээш, хөй санныг хөрек демдектериниң, хүндүлел бижиктерниң эдилекчизи.
ТАР-ның ордени-биле шаңнаткан маадыр өгбевис дайын соонда күрүнениң айыыл чок черинге, прокуратурага, коммунистиг партиялар эвилелиниң обкомунга секретарь-машинакчылап ажылдап каан.
Чылбак МОНГУШ, күш-ажылдың болгаш херээженнер шимчээшкининиң хоочуну, РФ-тиң хүндүлүг башкызы, Маадыр ие.
"Шын" №15 2025 чылдың апрель 24