Тываның ат-алдарлыг спортчулары тускай шериг операциязында киржип, эрес-дидим чоруун көргүзүп турарлар. Барыын-Хемчик кожууннуң Кызыл-Мажалык суур чурттуг эжишкилер Белек-оол Күжүгет биле Омак Сюрюннү “Шын” солун таварыштыр таныштырар-дыр бис.
Белек-оол Күжүгет 1992 чылдың июль 24-те Кызыл-Мажалык суурга, Андрей Далай-оолович биле Мая Борисовна Күжүгеттерниң 3 ажы-төлдүг өг-бүлезинге ортун оглу болуп төрүттүнген. Школачы чылдарында тренер башкызы Алим Байырович Ооржактың удуртулгазы-биле хостуг хүрешке дараазында спортчу тиилелгелерни чедип алган. Бичии оолдар аразынга 2008–2009 чылдарда Россия база 2009 чылда Европа чергелиг маргылдааларның тиилекчизи, элээди оолдар аразынга 2009–2011 чылдарда Россия деңнелдиг маргылдааларның тиилекчизи, спортчу шаңналдарның эдилекчизи. 2010 чылда “Россияның спорт мастери” атты камгалап алган. ТывКУ-нуң күш-культура болгаш спорт факультедин 2024 чылда бот-өөредилге-биле дооскан. Белек-оол Күжүгет хөй бичии оолдарның ынак мөгези, тренери.
2017 чылда 55 дугаар мото-адыгжы (даг) шериг бригадазынга керээ ёзугаар инструкторлап киргеш, бо хүнге чедир ында ажылдап чоруур. 2022 чылдың февраль айдан бээр ТШО-да аныяк дайынчылар белеткээр инструктор.
Белек-оол Андреевич өг-бүлезиниң бүзүрелдиг ээзи, ажы-төлүнүң ынак ачазы. Улуг уруу Ай-кыс 9 харлыг, 2 класста өөренип турар. Оглу Алим 6 харлыг, бичии оглу Арзылаң 2 хар 5 айлыг. Өөнүң ишти Азията Бадыйевна — эмчи.
Белек-оол Күжүгеттиң эжи Омак Сюрюн 1988 чылдың январь 2-де Кызыл-Мажалык суурга 4 оолдуг Семен биле Оюмаа Сюрюннарның 2 дугаар оглу болуп төрүттүнген. Улуг акызы Орлан хууда сайгарлыкчы. 2 дуңмалыг, Руслан студент, Мерген башкы.
Омак школага өөренип тургаш-ла, тренер башкызы Алим Ооржактың удуртулгазы-биле 2005 чылда элээди оолдар аразынга Россияның хостуг хүрешке бирги чери дээш маргылдаага 2-ги черни ап, мөңгүн медальдың эдилекчизи болган. Улаштыр хей-аъды чүгленип, улуг мөгелер аразынга Россияның чемпионаттарынга (2011, 2012, 2013, 2014, 2017чч.) 3 катап мөңгүн, 2 катап хүлер медальдарны чаалап алган. Шериглер аразынга 2017 чылда делегей чемпионадының хүлер медалының эдилекчизи. Делегей чергелиг маргылдааларның 4 дакпыр тиилекчизи: АКШ-ка 2 катап, Франция биле Швейцарияга бир-бир катап. Омак хөй чылдар иштинде Россияның чыынды командазының кежигүнү чораан. “Делегей чергелиг спорт мастери” деп бедик атты камгалап алган. Новосибирскиниң күрүнениң педагогика университединиң күш-культура болгаш спорт факультедин 2015 чылда чедиишкинниг дооскан. Улаштыр республиканың чыынды командаларын белеткээр спортчу төпке тренерлеп ажылдаан. Арга-дуржулгалыг спортчу, тренер башкы бодунуң шериг эрттирер албан-хүлээлгезин, 55 дугаар мото-адыгжы (даг) бригадага 2017 чылда керээ чарып, техник-механик хүлээлгени прапорщик эргелиг күүседип кирипкен. Омак 2 оолдуң, 1 кыстың ачазы. ТШО-га 2023 чылдың май айдан дайынчыларның машина-техниказын хынаар, белеткээр техник-механиги.
ТШО-да киржип турар бистиң спортчу чаңгыс чер чурттугларывыска быжыг турушту, тиилелгени, каң кадык чанып кээрин күзеп каалыңар.
Алексей ЧАМБАЛ-ООЛ, хоочун спортчу.
Чурукту авторнуң архивинден алган.
«Шын» №9 2025 чылдың март 13