Россияның айыыл чок чоруун камгалаар талазы-биле тускай сорулгалыг дайынчы даалганы 2022 чылда күүседип тура, Украинада Изюм районда Балаклея суурнуң чоогунга аар-берге тулчуушкуннарга эрес-дидим чоруу дээш Күдер Ламажап РФ-тиң Президентизиниң Чарлыы-биле “Эрес-дидим чоруу дээш” медаль-биле шаңнаткан.
Совет Эвилелиниң болгаш амгы Россияның шаңналдарының аразында “Эрес-дидим чоруу дээш” медаль солдаттарның болгаш офицерлерниң аразында эң-не бедик дайынчы шаңнал. Бо медальды хууда эрес-дидим чоруун көргүскени дээш тыпсыр.
Шаңналды Күдер Владимировичиниң өөнүң ишти Анай-Хаак Экер-ооловна, ийи уруу, шупту өг-бүлези хүлээп алганнар. Оларның улуг уруу Шура ол хүн төрүттүнген хүнүн демдеглеп турган болгаш ачазынга шаңнал тывыскан хүн ийи дапкыр байырлал болган.
Күдер Владимирович Ламажап Эрзин кожууннуң Бай-Даг суурга төрүттүнген. Чедиги классты төрээн суурунуң школазынга, он бирги классты Кызылдың 11 дугаар школазынга дооскан. Тываның күрүне университединиң күш-культура болгаш спорт факультединиң 2003 чылда доозукчузу.
Шериг албан-хүлээлгезин Уссурийск хоорайда шериг кезээнге эрттирген. Шериг соонда сайгарлыкчылап турган. 2017–2020 чылдарда 55115 дугаарлыг шериг кезээнге керээ ёзугаар шериг херээн эрттирип турган. Шериг албан-хүлээлгезиниң хуусаазы төнерге, халажылгаже үнгеш, хууда сайгарлыкчы ажыл-херээн уламчылай берген.
/ ТР-ниң шериг комиссариады белеткээн.
"Шын" №32 2023 чылдың май 3