Эрзин кожууннуң бүгү чону часкы тарылга ажылдарын бир дем-биле эгелээн. Бажыңнар даштынга ногааларны, картофельди тарып алганнар.
Мөрен суурда чурттавышаан, Сылдыста барып ажылдап турар эмчивис Саяна Сагаачы бажыңының девискээрин долдур янзы-бүрү ногаа-чимис олуртуп алган. Эрес-кежээ эмчивис чонунга ээлдек-эвилең, чаңы чараш, бүдүштүг. Саяна Сүрүновна дыка үр үе дургүзунда кожуун төвү Эрзинге, Мөренге-даа ажылдаан.
Эмчиниң оглу Айзат Сүрүнович база иези ышкаш эрес-кежээ, төлептиг кижи болган. Ол амгы үеде малчын. Өөнүң ишти Солаңгы-биле бода болгаш чылгы мал азырап өстүрүп, 4 кызын ажылгыр-кежээ кижилер кылдыр кижизидип, эп-найыралдыг чурттап чоруурлар. Суурларга шак-ла мындыг ажылгыр-кежээ өг-бүлелер хөй болур болза, көдээ черниң амыдыралы сайзыраар, хөгжүүр. Ынчангаш аныяктар бо өг-бүледен үлегерден алыр болза эки деп бодаар мен.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур
«Шын» №41 2024 чылдың июнь 5