Ноябрьның 18–22 хүннеринде Тываның өөредилге албан черлеринге эрге-хоойлу билиглериниң неделязы болуп турар. Тыва Республиканың Чазааның чанында Назы четпээннер херектериниң болгаш оларның эргелерин камгалаар талазы-биле ведомстволар комиссиязының бот-идепкейи-биле назы четпээннерниң эрге-хоойлу культуразын хевирлээринче база оларның аразында корум-чурум үрээшкиннеринге удур профилактикаже угланган кампания чылда ийи катап чоруп турар. Уруг бичии турда-ла эрге-хоойлу билиглериниң эге билиглерин, ооң эргелериниң, хүлээлгелериниң, харыысалгазының дугайында чиге билиишкинни угаадыры чугула деп организакчылар демдеглээн.
Суд участогунуң эптештирилге судьязының дузалакчызы понедельникте Тываның даг-техниктиг техникумунуң сургуулдарынга эргелер болгаш хүлээлгелер дугайында лекцияны номчаан. Оолдар-уруглар кичээнгейлиг дыңнааш, уругларның эргелериниң дугайында билип алганын чугаалап, чамдыктары назы четпээннер дугайында хоойлужудулганы элээн хандыр өөренир күзелин илереткен.
Дараазында хүнде Тожу кожууннуң прокурорунуң дузалакчызы ИТТ адырында мегелээр бузурукчу чорук дугайында чугаалап берген. Сургуулдар харылзааның өске ужунда бузурукчуну канчаар билип алырын, ындыг таварылгада канчаар харыылаарын, интернет–садыглажылгадан бодун канчаар камгалаарын билип алганнар. Ол ышкаш микрозаймнарның айыылын кончуг таптыг тайылбырлап берген.
Неделя дургузунда 500 хире профилактиктиг хемчеглерни эрттирери планнаттынган. Республиканың шупту хоорай, суурларында 95 өөредилге албан черин: 16 техникумну база 79 школаны хаара тудар. Аңгы-аңгы органнарның төлээлери янзы-бүрү темалыг лекциялар, викториналар, экскурсияларны эрттирер. Республиканың Кадык камгалал яамызындан төлээлер элээдилерниң эр-кыс кижизидилгезинче угланган беседаларны чорудар.
А. МОНГУШ.
«Шын» №90 2024 чылдың ноябрь 23