ИЮНЬ 8 — РОССИЯНЫҢ СОЦИАЛ АЖЫЛДАКЧЫЛАРЫНЫҢ ХҮНҮ
323 чыл бурунгаар, 1701 чылдың июнь 8-те, социал адырже кичээнгей салып, аарыг, бертик-межел дуза хереглээн кижилерге дузалаар дугайында Петр I Хаанның айтыышкыны үнген. Чүс-чүс чылдар шуужуп эртсе-даа социал адыр күрүнениң эң-не чугула адыры болуп артпышаан. РФ-тиң Конституциязында бир онзагай черни ээлеп турар чүүл – чоннуң амыдыралын чаагайжыдары.
Кызылдың Улусчу чогаадылга бажыңынга Россияның социал ажылдакчыларының хүнүн демдеглээн байырлыг хурал болган. Аңаа ТР-ниң Чазааның Даргазының оралакчызы Орлан Сарыглар, ТР-ниң күш-ажыл болгаш социал политика сайыды Эдуард Сандан болгаш өскелер-даа киришкен.
Амгы үеде Тываның 80 ажыг муң чурттакчызы социал дузаны ап турар. ТР-ниң күш-ажыл болгаш социал политика адырында 31 албан чери бо хүннерде ажылдап турар. Берге байдалга таварышкан 3 муң хире өг-бүлелерге чылдың-на дузаны ук албан черлери чедирип турар. Чайгы дыштанылга үезинде 4 муң ажыг уругну дыштанылга лагерьлеринче хаара туткан. Социал адыр чылдан чылче чаарттынып, чаа чүүлдер немежип орарын билир бис.
ТР-ниң Чазааның Даргазының оралакчызы Орлан Сарыглар РФ-тиң Күш-ажыл болгаш социал политика яамызының база ТР-ниң Чазак Даргазының шаңналдарын шылгарааннарга тывыскан.
Улусчу чогаадылга бажыңының фойезинге социал ажылдакчыларның уруглар-биле кады кылган ажылдарын делгээн. Кызыл хоорайның социал төвүнде немелде өөредилге кичээлдериниң башкызы Лина Саая делгээн ажылдарын таныштырган:
"ТР-ниң Күш-ажыл болгаш социал политика яамызының тургустунганындан бээр 80 чыл болган юбилейи болгаш бүгү Россияда Социал ажылдакчының хүнүнге тураскааткан хемчегде киржип келдивис. Өөреникчилеримниң кылган ажылдарын сонуургадып делгээнивис бо. Уруглар эмчиниң сүмези-биле биске кээр. Айда каш-даа уруг боор. Эң-не эвээш дизе 15, хөй дизе 30 уруг кээп тур. Уруглар 10 хонук дургузунда кичээлдээр. Оолдар пластилин-биле янзы-бүрү чүүлдер кылырынга, а кыстар чуруттунарынга ынак болур чорду. Ажы-төлдүң кадыының байдалының аайы-биле сонуургалы база аңгы-аңгы болур".
Өвүр кожууннуң төлээлери база делгелгеге киржип келген. Өвүр кожууннуң социал төвүнде чайгы дыштанылга үезинде организастаан лагеринде 16 уруг хаара туттунган дээрзин Чойгана Шулуу медеглээн.
Айдың ОНДАР.
«Шын» №42 2024 чылдың июнь 8
![](https://shyn.ru/media/cache/2024/06/10/ydt2tajiwgc-57eaa0449c.jpg)
![](https://shyn.ru/media/cache/2024/06/10/5orbe8ilpjs-14bbe2b991.jpg)
![](https://shyn.ru/media/cache/2024/06/10/bapqav99ie-7674d97a3a.jpg)
![](https://shyn.ru/media/cache/2024/06/10/h323g4vpwlk-50f89b8c03.jpg)
![](https://shyn.ru/media/cache/2024/06/10/iu1zhgfclkq-b34c78e70c.jpg)
![](https://shyn.ru/media/cache/2024/06/10/tnl2jegkaya-2c4b49eee9.jpg)
![](https://shyn.ru/media/cache/2024/06/10/tup4itrcnw0-afe4b10da1.jpg)
![](https://shyn.ru/media/cache/2024/06/10/vce2h3xjrru-287636c70b.jpg)