| Номга үнелел |
Кижи бүрүзү төрүттүнген черинге сагыш-сеткилинден шүлүктү, ырыны, чогаалды тураскаадып бижип каан болур. Өскен-төрээн черим Эрги-Барлык дугайында 2019 чылда үнген “Энерелдиг Эрги-Барлыым” деп ном үнгенин дыңнааш, ол черде чурттап чоруур чаңгысклассчыларымдан чоргустуруп алдым.
Номнуң автору Эрги-Барлыкка чурттап, ойнап өскен Галина Хомушку. Галина Көк-ооловна – башкы, чогаалчы, журналист.
Номну “Эрги-Барлыым” деп ыры-биле эгелээн (сөзү Галина Хомушкунуу, аялгазы Альберт Тановтуу). Ырыда өскен-төрээн чериниң арыг аржаан суглары, ажыл-ишчи чонунуң база ада-иезиниң дугайында.
Номда Эрги-Барлык суурнуң колхоз-совхоз үезинде сайзыралы, аңаа ажылдап чораан ажыл-ишчи хоочуннарын, аныяктарын, алдар-аттыг даргаларын төөгүп бижээн. База ол черниң чурттакчыларының сактыышкыннарын киирген. Суурнуң кудумчу бүрүзүн ажыл-ишчи чоннуң фото-чуруктары-биле көргүскен. Эрги-Барлыктың эрес-кежээ, кайгамчык талантылыг чонун, коллективтерин кижиниң карактарынга чуруттунуп кээр кылдыр делгереңгей бижээн.
Мен өске черде чурттап турар болгаш номну сагыш-сеткилимден аажок сонуургап номчудум. Автор дыка эрте бо өртемчейден чорупканы хомуданчыг-дыр. Бир эвес Галина Көк-ооловна дириг чораан болза, “Четтирдим, дуңмам, чер-чуртувус дугайында мындыг солун номну бижип кааның дээш” – деп чугаалаксаар-дыр мен.
/ Олчатмаа ХОВАЛЫГ. Чаа-Хөл суур.
“Шын” №7 2026 чылдың февраль 26