Эрткен неделяда Тыва Республиканың Чазааның хуралынга регионга оперативтиг байдалды болгаш эрге-чагырга органнарынга хамаатыларның киирген дыңнадыгларын сайгарып чугаалашкан.
Эзиртир суксуннарны садарының, орукка шимчээшкинниң болгаш хөй-ниитиниң чурумун үрээни илерээн таварылгаларны хынаар талазы-биле истелге-оперативтиг ажылдар уламчылап турар.
Иштики херектер яамызының ажылдакчылары Таңды кожуунда Чагытай, Дус-Хөл, Хадың хөлдерниң девискээринге июнь айның 26–28 хүннеринде профилактиктиг оперативтиг хемчеглерни ап чоруткан. Үш хамаатыга хулиган херекти үүлгеткени дээш, Россия Федерациязының Хамааты кодекизиниң 20.1 чүүлү ёзугаар протоколду профилактиктиг рейд үезинде тургускан, автотранспортту эзирик башкарып чораан 8 чолаачыны, чолаачы шынзылгазы чокка автотранспорт башкарып чораан дөрт хамаатыны туткан.
Россияның Онза байдалдар яамызының Тыва Республикада кол эргелелиниң дыңнадыглары-биле алырга, эрткен неделяда техниктиг чылдагааннар-биле хып үнген 19 өрттү өртчүлерниң командалары өжүрген. Ол өрттерден амы-тынындан чарылган, кемдеп-кергээн кижилер чок.
Биче хемчээлдиг хемелер талазы-биле күрүне инспекциязының төвүнүң ажылдакчылары хемнер болгаш хөлдерге профилактиктиг эжиндириишкиннерже үнүп, эштип дыштанып турар кижилерге сугларга айыыл чок болурунуң дугайында тайылбыр ажылын чорудуп, онза кичээнгейни ада-иезиниң хайгааралы чокка сугга эштип турар уругларже угландырган.
Эрткен неделяда республиканың күрүне эрге-чагыргазының органнарынче хамаатылар 527 дыңнадыгларны чоруткан. Оларның хөй кезии социал четкилер дамчыштыр кирген. Дыңнадыглар колдуунда кывар-чаар чүүлдерниң өртээнге, школаларның доозукчуларының медицина шынзылгаларын электроннуг хевирге долдурарынга, чайгы дыштанылга лагерьлеринде ажы-төлдүң айыыл чогунга, чуртталга-коммунал ачы-дузазын чедирип турарының шынарынга хамаарыштыр болган.
/ Бистиң корр.
“Шын” №25 2026 чылдың июль 2
Чурукту ТР-ниң Чазааның парлалга албанындан алган.
"Шын" солуннуң МАХ-каналынга каттыжыңар: max.ru/join/egenQ...