Февраль 11-де Москвага Тываның Баштыңы Владислав Ховалыг “Роскызыгаар тудуунуң” удуртукчузу Геннадий Безлобенко-биле ажылчын ужуражылганы эрттирген. Аңаа Россияның Транспорт яамызының күрүне кызыгаары эртер пунктуларны хөгжүдер талазы-биле күрүне политиказының департаментизиниң директору Михаил Кокаев киришкен.
«Хандагайты автомобиль эрттирилге пунктузун доозар айтырыг кол тема болган. Ол бистиң стратегтиг объективис болур. Россияның Чазаа биле Моолдуң Чазааның аразында дугуржулга езугаар, Хандагайты (Россия) – Боршоо (Моол) ийи талалыг автомобиль эрттирилге пунктузун хөй талалыг кылдыр өскерткен. Тудугну эде тудуп доозуптарга-ла, ол чурум ажылдап эгелээр» — деп, республиканың Баштыңы социал четкилерде бодунуң арынында дыңнаткан.
Роскызыгаар тудуу чаарттынган эрттирилге пунктузун 2025 чылда ажыглалче дужаар планныг. Каайлы контролюн чорударынга эргежок чугула 50 тудугну тудар. Логистика терминалын ажыглалче киириптерге, ооң эрттирилге күчүзү ийи катап улгадып, хүнде 200 хире санныг транспорт чеде бээр.
Республика бо төлевилелди 2030 чылга чедир Тываның бот-тускайлаң хөгжүлде программазында көрдүнген тудуг төлевилелдериниң даңзызынче киирип тургаш, Россияның Чазааның талазындан деткимчени чедип алганын Тываның Баштыңы онзалап демдеглээн. «Сибирь дугуржулгазы» регионнар аразының ассоциациязының Транспорт талазы-биле координация чөвүлелиниң даргазы болур Владислав Ховалыг Сибирьниң регионнары ону боттандырарынга сонуургалдыг дээрзин демдеглээн, чүге дизе оларның хөй кезиинге ол Моол болгаш Кыдатче эң кыска транспорт оруун тургузуп турар.
Республика Баштыңы келир үеде Россия–Моол кызыгаарының Тыва участогунда – Эрзин кожуунда Цаган-Тологойда база бир эрттирилге пунктузунга хөй талалыг эртер чер эрге-байдалын дилээр сорулгалыын дыңнаткан. Роскызыгаар тудуу 2025 чылда аңаа улуг септелге ажылдарын эгелээр планныг.
А. МОНГУШ.
“Шын” №5 2025 чылдың февраль 13
