16 өөредилге чери, 10 культура одаглары, 7 кадык камгалалынга хамааржыр оран-савалар, 6 чагырга черлери, 1 аалчылар бажыңы, 1 хөй-ниити чунар-бажыңы дээш ниитизи-биле 41 объектилериниң одалгазы чедимчелиг кыштап турар.
Ноябрь, декабрь айларда чыккылама сооктар дүжүп, агаарның температуразы -50, -60 чедип турганындан хөмүр-даштың чарыгдалы улгаткан. Ынчалза-даа хөмүр-даш складтарынга хөмүр чаңгыс-даа үзүктелбээн. Бо хүнде Эрзин сумузунуң Комсомольская кудумчузунда хөмүр-даш складында 82,945 тонна хөмүр курлавырда бар.
2024 чылдың январь 1-ден эгелээш Эрзин кожуунда хөмүр-даштың өртээ Эрзин сумузунда 1 тоннада – 5211 рубль, Нарында – 5513 рубль, Мөренде – 5416 рубль, Качыкта – 6866 рубль, Булуң-Бажында – 5264 рубль, Бай-Дагда 5157 рубль болуп турар.
Ниитизи-биле 12372 бода, 109097 шээр, 10946 чылгы бар болгаш 115 теве кожууннуң 291 кыштаанда кыш ажып турар.
Кожуунга ниитизи-биле 14715,5 тонна сигенни күзүн белеткээн турган.
«2023–2025 чылда Эрзин кожуунга көдээ ажыл-агыйның хөгжүлдези болгаш көдээ ажыл-агыйның продукциязын рынокка өйлээри» муниципалдыг программадан сиген садарынга 208,0 муң рубль көрдүнген турган. Сигенни план езугаар Таңдыдан сөөртүп эккелгеш, кыштагларже чедирген. Кожууннуң көдээ ажыл-агый адырының специалистериниң киржилгези-биле малчыннарның сиген-ширбиилиниң курлавырының кайы хирезин анализтеп өөренип көрүп турар.
Малчын аалдарже оруктарның харын аштаарынга ажыглаары-биле кожууннуң бюджединден 372 673 муң рубльди кывар-чаар чүүл садарынга аңгылаан. Малчын кыштагларже баар оруктарның харын удаа-дараа аштап турар.
Республика курлавырындан 542 дүрүг азы 196 тонна сигенни, 5 тонна суланы, 25 тонна тускай мал чемин кожууннуң фермерлеринге үлештир чедирген.
Кожууннуң шупту сумуларының девискээринде малчын кыштагларже үнүүшкүннерни кылган. Малдың деңгели амдыызында ортумак байдалда. Мал оолдаашкыны план езугаар март төнчүзүнде болур.
Бистиң корр.
«Шын» №6 2024 чылдың январь 27
