Совет үеде бир катап эртен эрте “Шын” солуннуң кол редакторун улуг албан-дужаалдыг дарга “хевис кырынче" чалаан дээр.
Редактор кончуг дүрген чеде бээрге, дарга ооң мурнунга “Шын” солунну чада салгаш:
-- Улуг баштыңчывыс дугайында чүү деп бижип кааныңар ол! – деп алгырып кончуттунуп, солунда Сталинниң чуруунуң адаанга айтыр-салаазын үстүрген.
Сирилээн-кавылаан редактор Сталинниң чуруунуң адаанда одуругну номчуп көөрге, “Аш Сталин” деп бижип каан болган. Корткан-ирткен редактор хөөкүй турган-на черинге моорап каг часкан.
-- Эш Сталинни Аш Сталин деп солунга бижээниңер дээш, кол редакторнуң албан-дужаалындан халаткан силер – деп, дарга чаңчаттынган.
Солунну линотип аргазы-биле парлап үндүрүп турар шагда одуругда үжүк частырыы бар болза, ол частырыгны типографияга эдерде, одуругнуң шуптузун катап өрүүр апаар. Катап өрүп олургаш, линотипист ол-ла одуругга частырыг кылып каап болур. Одуругга частырыг үнмезин дээш, корректор ол одуругнуң шуптузун хынап номчуур ужурлуг. Ынчанмас болза, частырыглыг сөстен өске сөс частырыглыг өрүттүнүп болур.
“Шын” солуннуң төөгүзүнде херек кырында болган азы болбаан, баштак дамчыыр чугаа апарган таварылгада линотипист “Эш Сталинни" “Аш Сталин” кылдыр өрүпкенинден, одуругну корректор кичээнгейлиг номчуваанындан политиктиг частырыг үнген.
Солунну парлалгаже дужаар мурнунда бижээн материалдарны корреспондент, килдис эргелекчизи, харыысалгалыг секретарь, корректорлар, кол редактор – мынча хөй кижи канчаар-даа “быттап” хынап каарга, частырыг эрте берип боорун журналистер шупту билир. Солунга частырыг үнмезин дээш, харыысалгалыг журналист хамыктың мурнунда – кол редактор.
Солуннуң кол редактору кончуг “айыылдыг” албан-дужаалдарның бирээзи. Чаңгыс үжүк соора бижиттинип, солунга политиктиг частырыг үнер болза, ону албан-дужаалындан ол-ла дораан халап кааптып болур.
2025 чылдың август 28 “Шын” №33