«Тыва – өңнүктерге» регионнар аразының этнотурисчи өөредиглиг шуулган июнь 12-ден 15-ке чедир үргүлчүлээр. Ол Россияда Өг-бүле чылынга тураскааттынган болгаш, Бурят, Тыва, Саха республикаларның «Чаш назынның навигаторлары» федералдыг төлевилелдиң киржикчилериниң аразында эртип турар.
Шуулганның бир дугаар киржикчилери, Саха Республикадан аалчылар, Таңды кожуунда Сосновка ортумак школазынга аалдап четкеш, улаштыр Дүрген шуралгаан сонуургап көргеннер.
Дүүн аалчыларга Бурят Республиканың төлээлери кээп катчып, Кызыл хоорайга Россия хүнүнүң байырлыг хемчеглеринге киришкеннер.
Шуулганның киржикчилери-биле ТР-ниң Чазааның Даргазының оралакчылары Айдың Чюдюк база Орлан Сарыглар ужурашкан.
Бо хүннерде аалчылар уругларның «Орлята» кадыкшылга лагеринге чедип, чаштар-биле ужурашпышаан, арга-дуржулгазын солчурлар. Эртен «Чаш назын навигаторларының» Россияда Өг-бүле чылында ада-иениң хөй-ниитизи-биле ажыл-чорудулгазы» «төгерик стол» болуп эртер. Аңаа республикада өөредилге албан черлеринде директорларның чөвүлекчилери киржир.
Бистиң корр.
“Шын” №44 2024 чылдың июнь 15