Эрзин кожууннуң Чонну ажылга хаара тудар төвүнге чеде бердим. Ол албан чериниң даштындан тура өң-баазын чараш чечектер, ногаалар тарып каан болду. Шынап-ла, ол ажылдаар черниң иштинче-даа кире бээрге, арыг-силиг, чылыг, чырык. Даргазы Нина Дажыевна Дажы эвилең-ээлдек, чугаакыр болду. Бир өрээлде аныяктар ажылдап олурар. Оларның база аажы-чаңнары чараш, чонну хүлээп алырда, эвилең-ээлдек болдулар. Елизавета Күр, Байыр-кыс Алексеевна Ломбу, Өлзеймаа Викторовна бухгалтерия уруглары езулуг-ла ажылчын олуттарын тып алган специалистер.
Бо эвилең-ээлдек коллективке моон-даа соңгаар эки ажылдаарын “Шын” солун таварыштыр күзеп каайн.
Мөрен суурнуң культураның болгаш библиотеканың ажылдакчылары демниг ажылдап турарлар. Библиотека эргелекчизи Долита Ликтановна Бичелдей биле Лилия Борисовна Анзайның эки ажылын демдеглеп болур. Олар ай санында кырган-авалар-биле дыка-ла солун чүүлдерни кылып турарлар. Хоочуннар янзы-бүрү солун номнарны ном саңынга келгеш номчуп турарлар. Номнар номчуурундан аңгыда, кырган-аваларга даараныр, аргыттынар база библиотека ажылдакчылары организастап турар.
Бичии чаштарның ойнаар, номчуттунар булуңу база бар. Ынчангаш бо ном саңының номчукчуларының саны хүнден хүнче көвүдеп турар. Библиотека ишти дыка чылыг, арыг-шевер. Культура бажыңының директору Чаймаа Чамзыевна Баанайның ажылын эки деп демдеглекседим.
Мөрен суурнуң Культура бажыңының чаны-биле эртерге, үргүлчү-ле хөгжүм дыңналып турар. Ында дыка-ла солун шиилерни көргүзүп турарлар. Ырлаарынга, танцылаарынга салым-чаяанныг хөглүг аныяктарывыс бары өөрүнчүг-дүр. Оларның аразындан Б. Айдыс, Т. Радж дээш өскелерни-даа адап болур.
Ажыл-сүзүү, чедиишкиннер
Ам-даа улам нептерезин.
Чогаадыкчы үүлеңер
Чогуп-бүдүп чоруур болзун.
Чечекмаа САДИ,
ТР-ниң алдарлыг ажылдакчызы.
Эрзин кожуун, Мөрен суур.