АВТОТРАНСПОРТТУ ЭЗИРИК БАШКАРЫП ЧОРУУР ЧОЛААЧЫЛАР-БИЛЕ ДЕМИСЕЛДИ АКША-ТӨГЕРИК- БИЛЕ КҮШТЕЛДИРЕР ШИИТПИРНИ РЕСПУБЛИКАНЫҢ ЭРГЕ-ЧАГЫРГАЗЫ ХҮЛЭЭП АЛГАН.
Бо шиитпирни күштүг болдурар дугайында Тыва Республиканың Чазааның доктаалынга Тываның Баштыңы Владислав Ховалыг холунуң үжүүн июль 9-та салган. Ол хүнден хоойлу-дүрүм талазы-биле күштүг апарган доктаал ёзугаар Тываның Баштыңының администрациязының айыыл чок чорук талазы-биле департаментизинче болгаш оруктарга айыыл чок чорук албан черлеринче машина-техниканы эзирик башкарып чораан чолаачылар дугайында телефоннап, автооруктарга озал-ондактың уржуктарын баш бурунгаар чайладырының хемчээнге киришкен кижилер 2,5 муң рубль шаңнал акшаны ап болур.
Автотранспортту эзирик башкарып чораан чолаачылар-биле демиселге чурттакчы чонну хаара тудар талазы-биле акцияларны республикага үргүлчү чорудуп келген. Ынчалза-даа эзирик чолаачылар дугайында автооруктарга айыыл чок чорук талазы-биле ажылды чорудуп турар чогуур органнарга дыңнатканы дээш, акша шаңналын бээр арга-хорганы Тывада чаа-ла ажыглап эгелээни ол. Оруктарга автотранспорт озал-ондаан болдурбас дээш, сагыш-сеткили дүвүреп чоруур кижилерниң идепкейин акша шаңналы улам көдүрер дээрзинге идегел тус черниң эрге-чагырга органнарында бар.
Тываның оруктарынга машиналарны эзирик башкарып чорааш, Күрүнениң автоинспекция ажылдакчыларынга туттурган чолаачыларның саны 2023 чылда көвүдээнин бо албан чери массалыг информация чепсектери дамчыштыр дыңнадып турган. 2024 чылда база эзирик чолаачылар-биле байдал нарын бооп артпышаан. Машиналарны эзирик мунуп чорааш, туттурган азы автооруктарга озал-ондак кылган эзирик чолаачылар дугайында республиканың КАИ албаны үргүлчү дыңнадып турар. Июль 8-те Кызыл хоорайга эзирик чолаачы, светофорнуң кызыл өңү хып турда-ла, кудумчу белдиринче үне халыткаш, өске машинаны барып үстүрген. Машиналарның үскүлешкени дыка күштүг болган – олар светофорну үрей тавартканнар. Орукка озал-ондакка буруулуг чолаачы ооң мурнунда машинаны эзирик мунуп чорааш, чолаачы шынзылгазын хавырткан, автотранспорт башкарар эргези чок кижи болган.
Кызыл хоорайның садыгларының бирээзиниң чанынга ээзи эжиин дуглавайн, дүлгүүрүн база ооң иштинге каапкан машинаны эзирик кижи оорлап мунупкаш, КАИ ажылдакчыларындан дезип халдып тургаш, солагай талакы дачаларга элээди оолду бастырып каар часкан, Ровенская биле Калинина кудумчуларга 3 машинаны үрей үстүргеш, шагдааларга туттурган.
Эзирик чолаачыларның буруузу-биле Тываның автооруктарынга озал-ондактарның хөй нуруузу болуп турар. Байдал ындыг нарын апарганда, машина-техниканы эзирик башкарып чораан чолаачылар дугайында телефоннап, автооруктарга озал-ондактың уржуктарын баш бурунгаар чайладырынга киришкен кижилерге 2,5 муң рубль акшаны бээри чөптүг дээрзин Тываның чурттакчылары деткип турары социал четкилерден көскү. Ол акша шаңналды 18 хар четкен назылыг хамаатылар ап болур.
Машинаны эзирик башкарып чоруур чолаачылар дугайында чогуур органнарга дыңнадыглар дээш акша шаңналын хамаатыларга бээриниң арга-дуржулгазын Россияның беш регионунда ажыглап турар. Олар дээрге Коми биле Марий-Эл республикалар, Вологодск биле Нижегородск областар, Ямало-Ненец автономнуг округ.
Ш. ЛОПСАН белеткээн.
Чурукту интернеттен алган.
"Шын" №54 2024 чылдың июль 20
![](https://shyn.ru/media/cache/2024/07/21/xw8xqzjb9cs-c228bb9013.jpg)