Бөгүн, июнь 8-те, РФ-тиң Федералдыг Хуралының Федерация Чөвүлелиниң социал политика талазы-биле комитединиң кежигүннери Тывада аалдап келген.
Федерация Чөвүлелиниң комитединиң социал политика талазы-биле даргазының оралакчызы Елена Бибикова баштаан комитет кежигүннери ийи хүн дургузунда кадык камгалал, социал политика, спорт болгаш туризм адырында республиканың социал ужур-уткалыг чугула айтырыглары-биле таныжар. Ажыл-агыйжы команда бир-ле дугаарында, чоокта чаа тургустунган Ада-чурт камгалакчыларының күрүне фондузунуң Тывада салбырынга четкеш, ооң ажыл-чорудулгазы-биле танышкан. Олар тускай шериг операциязының киржикчилери болгаш оларның өг-бүлелери-биле база ужуражыр аргалыг болган. ТР-ниң Чазак Даргазының социал политика талазы-биле оралакчызы Орлан Сарыгларның удуртулгазы-биле болган ужуражылгага ТШО киржикчилеринге база оларның өг-бүлелериниң кежигүннеринге таваржып турар эң-не чидиг айтырыгларны сайгарып чугаалашкан.
— Ада-чурт камгалакчыларының фондузунуң Тывада регионалдыг салбырынга келгеш, ТШО киржикчилери, эки турачылар, амгы үеде ажылдап турар кадр шериглер болгаш оларның өг-бүлелери-биле ужураштывыс. Чугаалажыышкынның түңнелинде, мындыг чаңгыс аай Фонд тургузар деп шын шиитпирни чурттуң Президентизи езулуг үезинде хүлээп алган деп көрүп тур мен. Чүге дизе ТШО киржикчилериниң база оларның өг-бүлезиниң кежигүннериниң айтырыглары аңгы-аңгы: инвалид эрге-байдалын тодарадып тургузарындан эгелээш, оларга чер участоктары, ажы-төлүнге уруглар садтары дээш оон-даа өске. Кажан Фонд чок турда, олар аңгы-аңгы албан черлеринче баар ужурга таваржып турган. Ол чүүл кижилерге хөй-ле шаптараазыннарны тургузуп турган. Ынчангаш Фондуну тургускан ужуру ол. Бо хүнде Россия Федерациязының шупту субъектилеринде болгаш Тывада Фондунуң салбырлары ажылдап турар. Ында ТШО киржикчилериниң база оларның өг-бүлелериниң шупту айтырыгларын шиитпирлежип дузалажыр, бир эвес шиитпирлеттинмес хире болза, ону федералдыг чадага чедир көдүрер ужурлуг специалистер ажылдап турар.
Бөгүнгү ужуражылгада чугаалашкан айтырыгларны шиитпирлээр ажылга бис база каттыжар бис. Мурнувуста салдынган сорулгаларны күүседип шыдаптарынга идегээр-дир мен – деп, комитеттиң социал политика талазы-биле даргазының оралакчызы Елена Бибикова чугаалаан.
Федерация Чөвүлелиниң командазында Волгоград, Иркутск, Сахалин областарының сенаторлары Сергей Горняков, Андрей Чернышев, Андрей Хапочкин база бистиң регионнуң сенатору Дина Оюн, ол ышкаш ФЧ-ниң социал политика талазы-биле комитединиң аппарадының удуртукчузу Марина Астахова, Күш-ажыл болгаш ажылга хаара тудар талазы-биле федералдыг албан чериниң удуртукчузунуң оралакчызы Ян Талбацкий олар Тывада келгенин Елена Бибикова дыңнаткан.
Комитеттиң үнүүшкүннүг программазында республиканың эмнелге албан черлеринге, ооң иштинде Перинаталдыг төпке, «Серебрянка» реабилитация төвүнге, туттунуп турар «Чедер» кадыкшылга черинге база Каа-Хем суурда спортчу-культура төвүнге чедери көрдүнген. Оон аңгыда Федерация Чөвүлелиниң комитет кежигүннери Социал ажылдакчы хүнүнге тураскааткан байырлыг хемчегге киржип, адырның ажылдакчыларын шаңнап-мактаар.
Даарта, июнь 9-та, Республика Баштыңы Владислав Ховалыгның киржилгези-биле комитеттиң улуг хуралынга регионнуң социал-экономиктиг хөгжүлдезиниң онза чугула айтырыгларын сайгарып чугаалажыр.
А. СОЯН.
Ада ТЮЛЮШТУҢ тырттырган чуруктары.
