Республикада өөредилге инфраструктуразын чаартыры-биле улуг хемчээлдиг ажылдар чоруп турар. Бо чылын школаларның капитал септелгелеринден аңгыда, техникумнарның чаартылгазы эгелээн. Россия Федерациязының Президентизи Владимир Путинниң регионнар биле Чазакка берген даалгазының ачызында ортумак профессионал өөредилге черлерин септеп база дериирин хандырар программа боттандырылгазының хемчеглери күүсеттинген.
2023 чылдан эгелеп регионда «Профессионалитет» федералдыг төлевилелдиң «Көдээ ажыл-агый» угланыышкынында өөредилге программалары ажылдап турар. Бо чылдың сентябрь 1-ден эгелеп ийи ортумак профессионал өөредилге черлери: Кызылдың тудуг техникуму биле Ак-Довурактың даг техникумунуң баазазынга «Тудуг» болгаш «Дагжы» угланыышкыннарга кластерлерни ажылдаткан. Бо төлевилелдерни боттандырып, өөредилге мастерскаяларын болгаш материал-техниктиг комплекизин элээн чаартып, «Профессионалитет» амгы үениң өөредилге төптери тургустунуп турар.
Ол угланыышкынга ажылдар ам-даа уламчылаар.
Россияның Чырыдыышкын яамызының конкурс шилилгезиниң түңнелдеринге даянгаш, 2026–2027 чылдарда ортумак профессионал өөредилге системазын чаартыр программаже агроүлетпүр, тудуг болгаш даг техникумнарының өөредилге корпустарын болгаш ниити чуртталга бажыңнарын киирген.
Ынаар ниитизи-биле 360 ажыг сая рубль федералдыг субсидияларны хаара туткан.
Бо чылын Тываның агроүлетпүр техникумунуң өөредилге корпузунда база хөй-ниитиниң чуртталга бажыңынга капитал септелгени кылганын сагындыраал. Ийи дугаар хөй-ниити чуртталга бажыңының септелгезин келир чылче планнаан.
ТР-ниң Чазааның парлалга албаны.
“Шын” №34 2025 чылдың сентябрь 4