«Тыва Республиканың чылдың башкызы – 2025» мөөрейниң регионалдыг чадазының тиилекчизи Айдаш Хертек шаңналга алган акшазын бодунуң школазында физика кабинединиң дерилгезинче үндүрген.
Ол «Бойдус-эртем өөредилгезиниң хөгжүлдези дээш» деп номинацияга тиилээш, сертификат кылдыр алган 500 муң рубль акшазы Каа-Хемниң школачыларынга амгы үениң билиин бээринге ёзулуг инвестиция болган.
Айдаш Александрович бодунуң ажылдап турар хоорайжаан Каа-Хем суурнуң 3 дугаар школазынга өөредилге дериг-херекселдерин саткан. Ам физика кабинединде чаа көргүзүг стендилери, «Электродинамика», «Механика» база «Квантовые явления» деп кезектер аайы-биле лабораторлуг комплектилер, ол ышкаш тускай херекселдер: электрофорлуг машиналар, шил савалар, дуга хевирлиг магниттер база амгы үениң электри дөстери немешкен.
2025-2026 өөредилге чылының эгезинде Айдаш Александрович башкылап турган школазын удуртуп эгелээн. Ол ам чүгле эртем башкызының эвес, а өөредилге албан чериниң системалыг хөгжүлдезинче угланган сорулгаларны шиитпирлеп турар.
«Чаа дериг-херекселдиң ачызында физика кичээлдери өөреникчилерге сонуурганчыг болгаш көргүзүглүг апаар. Ооң түңнели бүгү өөредилге хүрээлеңиниң хөгжүлдезинге болгаш бистиң школаның база регионнуң бойдус-эртем өөредилгезиниң шынарын бедидеринге ужур-дузалыг» — деп, Айдың Хертек демдеглеп турар.
Бистиң корр.
ТР-ниң Өөредилге яамызының медээзи болгаш чуруктары.
“Шын №2 2025 чылдың январь 22
