2024 чылды бистиң чуртувуска Өг-бүле чылы кылдыр чарлаан. Президентивис Владимир Путин «Россия − бистиң улуг өг-бүлевис» деп илеткээнин телевизордан дыңнап, солун-сеткүүлден номчаан бис.
Ынчангаш Өг-бүле чылынга тураскааткан "Өг-бүлевистиң чаңчылы ындыг" деп мөөрейлер регионнарда эртип турар. Мөөрейниң кол сорулгазы − амыдыралда идепкейлиг өг-бүлелерни илередири, деткиири.
Тывадан 6 команда киришкен бис. Мөөрей Красноярск хоорайның «Сибирь» стадионунга март 29–31 хүннеринде болуп эрткен. Командаларның чарыгдалдарын организакчылар төлеп берген. Бистиң командадан: мен, уругларым Аяна, Байлак Саттар база уйнуктарым бирээзи Кызылдың 1 дугаар школазының 8-ки классчызы Сырга Сат кириштивис.
Өг-бүле командавыс дараазында шылгалдаларны эртивис: угаан бодал сайзыралы, спортчузу, чогаадыкчы деңнели. Онаалгаларны интернет таварыштыр чорудуп турган болгаш, мөөрей ийи ай уламчылаан. Бердинген онаалгаларны демнежип күүседип тургаш, чартык финалче эрте берген бис. Хүндүлел бижик-биле шаңнаттывыс. Өөреникчи уругларым часкы дыштанылгазында Красноярск, Новосибирск хоорайларның чурумалдыг, төөгүлүг черлерин көрүп, мага хандыр дыштанып алдылар.
Түңнел мөөрейге киржир эргени Кызыл хоорайдан Долаана Алексеевна, Леонид Маадыр-оолович Дамдыннарның өг-бүлези алганнар. Оларга улуг чедиишкиннерни күзеп каалыңар. Мөөрей бедик деңнелге эртип турар-дыр, ынчангаш организакчыларның ажылын эки деп үнелээр-дир мен.
Дамдынчап ХОВАЛЫГ, күш-ажылдың хоочуну.
Кызыл хоорай.
“Шын” №29 2024 чылдың апрель 17
