Тывада үлегерлиг хөй ажы-төлдүг өг-бүлелерге Өг-бүле, ынакшылдың болгаш шынчы чорук хүнүнде чаңгыс удааның акша-хөреңги деткимчезин бээрин көрген. Республиканың Чазаа өг-бүлелерниң чамдык бөлүүнге социал деткимче хемчеглериниң дугайында регион хоойлузунга хамаарышкан эдилгени бо неделяда бадылаан. Ам Тываның Дээди Хуралы хоойлуже киирер өскерилгелерни сайгарып көргеш, шиитпирни үндүрер.
25 чылдан хөй өг-бүле стажтыг, “Ынакшыл болгаш шынчы чорук дээш” хөй-ниити медалы-биле шаңнаткан, үш азы оон хөй ажы-төлдү төлептиг кижизиткен өг-бүлелерге 5 муң рубль шаңналды тыпсыр дээн эгелээшкинни хоойлуже киирерин саналдаан. Бадылгалыг 50 чыл ажыг чурттаан «Өг-бүлениң үнелиг чүүлдерин кадагалап арттырганы дээш» Тываның медалы-биле шаңнаткан өг-бүлелерге 50 муң рубльдиң шаңналын көрген.
Республиканың Чазаа оон аңгыда, “Чылдың өг-бүлези” деп Бүгү-российжи мөөрейге тиилекчи болган өг-бүлелерге база ада-ие алдарының бедик ады – “Маадыр ие” атка төлептиг болган хөй ажы-төлдүг иелерге немелде төлевирлерни киирер сорулгалыг. “Чылдың өг-бүлези” мөөрейге тиилээни дээш 100 муң рубльди, а маадыр иелерге 1 сая рубль федералдыг акшага немей 500 муң рубльди Тываның бюджединден тыпсыр.
Республиканың Күш-ажыл яамызының дыңнатканы-биле алырга, 2025 чылда ниитизи-биле 79 өг-бүлени база Маадыр иени төлевирлер-биле шаңнаар. Маадыр ие кымыл дээрзи билдингир – ол 11 ажы-төлдүң авазы, тускай шериг операциязының киржикчизи Олимпий Монгуштуң өөнүң ишти Айнааш Ондар-дыр. Россияның Президентизи 2024 чылда Айнааш Владимировнага бедик атты тывыскан.
Кожуун чагыргаларының тускай комиссиялары база ТР-ниң Күш-ажыл болгаш социал политика яамызы немелде шаңналче киирер арткан кордакчыларны ам-даа тодарадыр.
ТР-ниң Чазааның парлалга албаны.
“Шын” №19 2025 чылдың май 22