Тываның Баштыңы Владислав Ховалыгның чарлааны Тургузукчу күш-ажылдың болгаш өг-бүле ыдыктарының чылында «Өг-бүлениң үжүглели» деп курсту «Логос» немелде өөредилге төвү оранизастаан. Кызылга «Абсолют-Помощь» ачы-буян фондузунуң деткимчези-биле өөренип алган ийи башкы Айсуу Полум биле Алдынай Бямбаа 27 ада-иеге курсту эрттирген.
«Өг-бүлениң үжүглели» деп программаны Россияның Өөредилге яамызының деткимчези-биле дуржулгалыг психолог Анаа Сванес удуртуп турар дээрзин сагындыраал.
Ада-иелер-биле шак бо ажыл мооң-биле доозулбаан, ам-даа уламчылаар дээрзи билдингир. «Логос» немелде өөредилге төвү школаның доозукчулары болур ада-иелер-биле ам-даа удаа-дараа ужуражылгаларны организастаар. Бо ажылды 2023 чылга чедир республика девискээринге ам-даа калбартырын «Логос» немелде өөредилге төвүнүң удуртукчузу Анна Сванес планнап турар.
«Өг-бүлениң үжүглели» курсту өөренип дооскан чамдык ада-иелер бодалдары-биле үлешкен: «Ажы-төлүмнү эки билип алырынга бо курс меңээ дузалады. Элээдилер-биле канчаар чугаалажырын, ажы-төлге хостуг шилилге бээрин, оларның орнунга бүгү шилилгени кыла бербейн, деткиири чугула дээрзин билип алдым. Ол ышкаш бодумнуң ада-иемни база эки билип эгеледим. Чаш уругнуң өзүлдезин эгезинден улуг кижи апаргыжеге чедир өөредип, амыдыралдан шын төөгүлерни бижээни дыка эки-дир деп үнелеп тур мен. Курс дээш четтирдим».
«Өг-бүлениң үжүглели» деп төлевилел бот-боттарының аразында харылзааларны экижидип алыксаан улуска, өг-бүлелерге кончуг таарымчалыг болду. Кандыг-даа артык «суг» чокка, езулуг-ла чугула херек чүүлдерни өөредип турар. Кижи бүрүзүнге бо курсту эртип алырын сүмелеп тур мен».
/ Надежда Шаталованың материалындан А. ОНДАР белеткээн.
Чурукту маадырның архивинден алган.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...