Гриппке удур тарылга

ТР-де Росхереглелхайгаарал эргелелиниң дыңнатканы-биле алырга, республикада ОРВИ аарыглары неделя санында 10-20 хуу көвүдеп турар. Ынчалза-даа амгы үеде аарыгның деңнели эгеки көргүзүгден эвээш болуп арткан. Республиканың Баштыңы В. Ховалыг ОРВИ азы грипптен аарыыр чоруктар санының көвүдээрин болдурбазы-биле профилактиктиг хемчеглерни күштелдирерин айыткан.
ОРВИ болгаш грипптен камгаланырының эң-не чедимчелиг аргаларының бирээзи – тарыдып алыры. Амгы үеде республикада тарылга кампаниязы дооступ, планнаанының 90 хуузу азы 185822 кижи тарыткан. Республиканың ниити чурттакчы чонунуң 61 хуузун азы 205848 кижини тарыыры – сезоннуг гриппке удур тарыышкынның ниити сорулгазы.
Республика Баштыңы эпидемиологтуг хайгаарал түңнелдери-биле танышкаш, планын чедир күүсетпээн кожууннар болгаш эмнелге албан черлери — Кызыл, Чеди-Хөл, Эрзин кожууннарга база республиканың консультативтиг-диагностика төвүнге тарылганың темпизин шапкынчыдар даалганы берген. Ол ышкаш бо айның төнчүзүнге чедир тарылга кампаниязын доозары чугула деп айыткан.
Бистиң корр.
Чурукту интернеттен алган: yandex.ru/images/sea...
“Шын” №43 2025 чылдың ноябрь 6