ТР-ниң Кадык камгалал яамызының медеглээни-биле алырга, федералдыг акшаландырыышкын-биле республиканың кадык камгалал курлавырынче 191290 доза гриппке удур вакцинаны эккелген. Ол дээрге 2024 чылда ТР-ниң Кадык камгалалының киирген чагыының 84 хуузу болуп турар. Эрткен сезонга көөрде, 17 хуу хөй болганын демдеглээли. Тарылганың ийи дугаар чадазы сентябрь, октябрь айларда уламчылаар.
«Ультрикс-Квадри» деп 45310 дөрт валентилиг вакцинаны бичии уругларга болгаш иштиг херээжен улуска, а «Совигрипп» болгаш «ФлюМ» деп үш валентилиг 34660 вакцинаны өске улуска салыры планда көрдүнген.
Бо чылын федералдыг акшаландырыышкын-биле саткан вакцинага немей республика бюджединден үндүрген 4,2 сая рубльге, «Совигрипп» деп уругларга болгаш улуг улуска тааржыр 23850 доза вакцинаны саткан. Удавас Тывага эккээр дээрзин ТР-ниң Кадык камгалал яамызы демдеглээн.
Ниитизи-биле 202539 кижиге тарылганы салыры планда көрдүнген. Оларның 92794-үн чаштарга, а 109745-ин айыылдыг бөлүкке хамааржыр улуг улуска тарыыр.
6 айдан өрү бичии уруглар, иштиг херээженнер, студентилер, шеригже келдиртип турар хамаатылар, кадык камгалалының болгаш өөредилге адырының, садыг-саарылганың, коммуналдыг албан чериниң база муниципалдыг албан черлериниң ажылдакчылары, хоочураан аарыглыг улус болгаш хаван, дагаа азыракчылары, 60 хардан өрү назылыг улус гриппке удур албан тарыткан турар ужурлуг.
Бистиң корр.
«Шын» №66 2024 чылдың август 31
Гриппке удур тарылга эгелээн
3 сентября 2024
17