Улусчу фронтуда ТШО-же чүък чыылдазы уламчылавышаан. План ёзугаар 20 тоннаның улуг чүък машиназы октябрь 15-те шимчеп үнүптер.
Сентябрьдан бо хүннерге чедир чарлаттынган күскү чыылдада автотехника, мототехника, генераторлар, чылыг үрер херекселдер, камгаланыр четкилер, камгаланып эштип алыр панцирь болгаш халат хептер, эм-таң, янзы-бүрү техниктиг херекселдер, чылыг хептер дээш бүгү Тывадан чүү-даа чыгдынып турар.
Бо ажылга кожууннарда тургустунган штабтар, республиканың девискээринде албан черлери, «Бүгү чүвени Тиилелгеже!» тѳлевилелдиң шугуму-биле кады ажылдап турар албан черлери болгаш бѳдүүн чурттакчы чон күзелдии-биле киржип турар. Улуг коллективтерден аңгыда, патриотчу болгаш энерел сеткилдиг кижилер барын Улусчу фронтунуң Тывада салбырының удуртукчузу Саима Далчин демдеглеп турар. Чоокта чаа тѳлептии-биле хамааты хүлээлгезин эрттирип чоруур «Сына» деп кыйгы аттыг дайынчы шѳлээлеп келген үезинде фронтуда байдалдарны таныштырбышаан, тыва дайынчыларга техниктиг дериг-херекселдер-биле дузалаар дугайында чагыгны киирген.
«Сынаның» дилээн хандырары-биле октябрь 7-де Улусчу фронтуга Күрүне статистиказы федералдыг албанның Красноярск край, Хакас, Тыва республикаларда эргелелиниң Тывада чон чизези болгаш шинчилелдер килдизиниң даргазы Темир Кулдун Красстаттың ажылдакчыларының мурнундан дүне кѳѳр херекселди, эм-таңны, идик-хеп, аъш-чемни эккеп хүлээткен. Бо коллектив ТШО эгелээнден бээр-ле тыва дайынчыларның чагыгларын хүлээп ап, квартал санында херек чүүлдерни садып берип турар.
Статистика ажылдакчыларындан аңгыда, «Тос-Карак» хамнар ниитилелиниң чанында «Тос-Карак» коммерциялыг эвес албан чериниң удуртукчузу Шончалай Докпай-оол баштаан ниитилел кежигүннери чылыг уктар, идик оъттары, эм-таң болгаш боттарының кылганы камгалалдар суп каан рюкзактарны болгаш камгалал халаттарны эккелген. Айның эки хүнүн кѳрүп алгаш, ТШО-да киржип турар тыва дайынчы оолдарның хей-аъды, сүлдези бедик чорзун дээш, саң салып, ёзулалдарны үргүлчү эрттирип турарын Ш.Докпай-оол демдеглээн. Тѳрээн чер-чуртунче амыр-менди ээп чанып келзин дээш ие чери-биле хини тудуш камгалалдар улуг ужур-дузалыг.
Октябрь 15-ке чедир ам-даа каш хонук бар-дыр, киржир күзелдиглерни Улусчу фронт кыйгырып тур.
Идегел МОНГУШ.
Буян ООРЖАКТЫҢ тырттырган чуруктары.
“Шын” №77 от 2024 чылдың октябрь 9
