☺
Бичии Аянмаа дыңнаарга-ла, телевизорда “Хөгжүмнүг байыр” дамчыдылгазында “байыр чедирип тур бис” деп сөстер дыңналып-ла турар. Ол сөстер аңаа дыка-ла элдептиг болган. Ачазының ады Байыр болгай. Ол боданып-боданып, ужурун билбейн: “Телевизорда мээң ачамны кайнаар, чүге чедирип турар улус боор?” – деп, авазындан элдепсинип айтырган.
☺
Беш харлыг Алдынайның даайы телевизорга интервью берип турган. Кежээ ооң ада-иези, даай-авалары ону көөр дээш, телевизор баарынга чыглып келгеннер. Бичии Алдынай даайының кайда чугааланып олурарын аайын тыппайн, телевизорнуң арты-мурнунче бакылагылаар-даа. Кажан даайы чедип келирге: “Телевизор иштинге олурарга, изиг-дир бе?” – деп, ол айтырган.
“Шын” №3 2026 чылдың январь 29