Күске чылдыг кижилерниң
Күзелдери бүдер чыл-дыр!
Акшалары сая-сая
Ажылынга бедиир дээн-дир!
Инек черле кайгамчыктыг
Ишти-хөңнү ынакшылда.
Кылган ижи деткимчелиг,
Кылаң тас боор эки чыл-дыр!
Парның чылы кирген болгаш,
Бардам, маажым эртер боор-дур!
Акша-шалың көвүдээр-дир!
Алдар-атка чедер боор-дур!
Кодан чылдыг коллегага
Кончуг эки чыл-даа келген!
Тергииннерниң тергиини бооп,
Дендии бедип өзер дээн-дир!
Улу чылдыг улустарның
Угаан-биле четчир өйү!
Алдын-мөңгүн адыжынче
Ала-чайгаар кирер боор-дур!
Чылан чылдыг кижилерге
Чыргал тыпкан үе кээр-дир.
Хууда бодаан бодалдары,
Күзелдери бүдер дээн-дир.
Аът чылдыг чарашпайлар
Алдар-аттыг сылдыс боор-дур.
Агар санче акшалары
Анаа хүннүң кирер боор-дур!
Хой чылдыг кижилерге
Кончуг эки ховар байдал.
Миннип безин четтикпээнде,
Миллионнар чайгаар келир!
Мечи чылдыг кижилерге
Мерген угаан немежир-дир.
Ынакшылдың чараш ырын
Ындынналдыр бадырар-дыр!
Дагаа чылдыг тааланчыг
Таптыг өйге таваржыр-дыр.
Каткы-хөглүг чаңы-биле
Каяа-даа бол, тергиин боор-дур!
Ыт чылдыг кезээ шагда
Ылым-чылым олурза-даа,
Хүндүткелдиг бедик олут
Хүлээп алыр өйү келген!
Хаван чылдыг камныг кижи
Кайгамчыктыг сөңнү алыр!
Чылды өттүр чыргал көрүп,
Чындыңнадып чоруур дээн-дир.
Вилория ШОЖУКПАН.
"Шын" №100 2024 чылдың декабрь 28