Тыва Республикага дыл политиказын боттандырарының болгаш национал дылды камгалап арттырар талазы-биле күрүне комиссиязының хуралы дүүн, март 31-де, Тываның гуманитарлыг болгаш тускай социал-экономиктиг шинчилелдер институдунга болуп эрткен. Ол хуралга 2024–2033 чылдарда тыва дылды деткиириниң болгаш хөгжүдериниң күрүне стратегиязының дугайында чугаалашкан. Комиссияның хуралынга Тываның Баштыңы Владислав Ховалыг киришкен.
Тываның гуманитарлыг болгаш тускай социал-экономиктиг шинчилелдер институдунуң директору Вячеслав Март-оол, ол-ла институттуң дылдар талазы-биле секторунуң эргелекчизи Байлак Ооржак олар 2024–2033 чылдарда тыва дылды деткиириниң болгаш хөгжүдериниң күрүне стратегиязының дугайында илеткел дыңнадыышкыннарны кылганнар. Ооң соонда хуралдың киржикчилери эртемденнер, тыва дыл башкылары дээш өскелер-даа тыва дылды хөгжүдериниң күрүне стратегиязынга хамаарыштыр бодалдарны солчуп, санал-оналдарны кииргеннер.
Филология эртемнериниң доктору Каадыр-оол Бичелдей тыва дылды камгалаарының болгаш хөгжүдериниң стратегиязының чамдык чүүлдери тодаргай эвезин демдеглээн. “Тыва дылдың амгы байдалы – айтырыглары – оларны шиитпирлээри” шугумга стратегия ажылдап кылдынган болур ужурлуг деп, ол чугаалаан. Республиканың школаларында тыва дылда өөредилге барык чок чыгыы, төрээн тыва дылывысты даштыкы дыл ышкаш кылдыр өөредип турар апарганынга хомудалын илереткен.
Тыва дылды хөгжүдериниң стратегиязынга бодунуң хамаарылгазын филология эртемнериниң доктору Мира Бавуу-Сюрюн илереткеш, Каадыр-оол Бичелдейниң бодалдары-биле чөпшээрешкен.
2024–2033 чылдарда тыва дылды деткиириниң болгаш хөгжүдериниң күрүне стратегиязын ажылдап кылганнарның бирээзи, Тываның гуманитарлыг болгаш социал-экономиктиг шинчилелдер институдунуң кол эртем ажылдакчызы, филология эртемнериниң доктору Байлак Ооржак кандыг негелделерни, федералдыг стандарттарны барымдаалап, стратегияны ажылдап кылганын тайылбырлаан.
Хуралдың киржикчилериниң бодалдарын болгаш санал-оналдарын дыңнааш, 2024–2033 чылдарда тыва дылды деткиириниң болгаш хөгжүдериниң күрүне стратегиязы-биле ам-даа ажылдаарын, ооң-биле чергелештир стратегияны боттандырарының орук картазын ажылдап кылырын Тываның Баштыңы Владислав Ховалыг саналдаан.
/ Бистиң корр.
Ада ТЮЛЮШТУҢ тырттырган чуруктары.
"Шын" 2023 чылдың апрель 1 №23
#Шын #Тыва #ТываныңБаштыңы #ТываДыл #ТГШИ
