Республикада ниитизи-биле 96 муң 432 өг-бүле бар. Оларда 17 харга чедир 122 муң 938 уруг кижизиттинип турар. Хөй ажы-төлдүг өг-бүлелер саны 32 муң 280 четкен. Азы өскээр чугаалаарга, ниити өг-бүлелер санының 33,5 хуузу болур. 2023 чылдың сан-чурагайы-биле алырга, социал дуза хереглеп турар өг-бүлелер саны 21 муң 918. Оларның саны күрүне деткимчезиниң ачызында эвээжей берген. Ынчалза-даа ниити өг-бүле санынга деңнээрге, хөй болуп артпышаан.
Бистиң республикада хөй ажы-төлдүг өг-бүлелерге деткимчени база берип турар. Өөредилге черлеринче хөй ажы-төлдүг өг-бүлелерниң уругларын бир дугаар оочурда хүлээп алыр. Хөй ажы-төлдүг өг-бүлелерниң 6 хар чедир уругларынга эмчиниң бижип бергени эм-таң аймаан база медицина херекселдерин халас үндүрүп бээр. Чурттап турар чериниң аайы-биле садыглажылга чокка чер участогун база бээр. 2023 чылда ниитизи-биле 67 муң 600 дөрбелчин метр хемчээлдиг 95 чер участогун берген. Уруглар садтарынче барып турар ажы-төлүнүң төлевириниң 70 хуузун компенсация кылдыр эгидип берип турар.
2024 чылда 150 муң 102 рубль компенсация көрдүнген. Амгы үеде 8 муң 455 өг-бүлеге төлеп берген. Уругларның кадыкшылга лагерьлеринче чиигелделиг путевкалар-биле бир дугаар оочурда хандырып турар. Бо чылын уруглар лагерьлеринге 682 назы четпээн уругну дыштандырган. Ол ышкаш “Социал хөмүр” деп төлевилел-биле хөмүр-даш болгаш одаар ыяшты берип турар. 2020 чылда бо төлевилел-биле 7 муң 143 өг-бүлени одаар чүүл-биле хандырган. Орулгазының көвүдей бергени-биле 2023 чылда оларның саны 3 муң 509 чедир эвээжээн. Хөй ажы-төлдүг өг-бүлелерниң бажыңнарын кезип тургаш, өртке удур медээлээр херекселдерни база салып берип турар.
Чыжыргана СААЯ белеткээн.
Чурукту интернет четкизинден хоолгалаан.
“Шын” №92 2024 чылдың ноябрь 30