Украинаның девискээринге тускай даалгалар күүседип тургаш, бодун хайыралавайн, эрес-дидим чоруун көргүскени дээш РФ-тиң Президентизиниң чарлыы ёзугаар Эрес-дидим чоруктуң ордени-биле мөчээн соонда шаңнаткан маадырывыстың дугайында таныштырар-дыр бис.
Сылдыс Андреевич Күжүгет Мөңгүн-Тайга кожууннуң Мугур-Аксы суурга 1986 чылдың май 19-та ажылчын өг-бүлениң 2 дугаар оглу болуп төрүттүнген.
Чашкы үезинде “Чечек” уруглар садынче барып турган. 1992 чылда Мугур-Аксының 1 дугаар школазынга бирги классче кирген. Ол ак сеткилдиг, идепкейжи, салган сорулгазын албан чедип алыр, өөрүшкү-маңнайлыг, дидим чүректиг. Ол бодунуң салым-чаяанын көргүзүп, клазының-даа, школазының-даа амыдыралынга, спортчу, янзы-бүрү культура хемчеглеринге идепкейлиг киржип чораан. 2003 чылда 11-ги классты дооскаш, улаштыр Кызылдың “ДОСААФ” автошколазынга өөренгеш, бир чыл болганда, “В”, “С” категорияның автомашина башкарар шынзылгазын алган.
Чурттап келген кыска назынының дургузунда ол 2 ажы-төлүнүң адазы, өөнүң иштиниң ынак эжи, төрелдериниң бүзүрелдиг чөленгиижи, эш-өөрүнүң ёзулуг өңнүү, кижи бүрүзү-биле кандыг-даа темага чугаалажыр турган. Оон аңгыда, ол кээргээчел, дузааргак, сагыш човаачал кижи. Бергелерге таварышкан улусту черле кагбас, кымга-даа дуза кадарындан ойталавас.
Шериг хүлээлгезин Россия Федерациязының Чепсектиг Күштеринге Чита хоорайның 48271 шериг кезээнге 2004–2006 чылдарда эрттирген. Түңнелинде, улуг сержант болган. 2006 чылдан тура Юрга хоорайга 21005 шериг кезээнге керээ ёзугаар оператор-геодезист кылдыр ажылдаан. 2009 чылда керээзиниң хуусаазы төнерге, курлавырже халажып үнген. Улаштыр 2010 чылда ол-ла шериг кезээнге БМ-21 “Град” комплекизинге взвод командириниң оралакчызы, машина командири деп албан-хүлээлгеже кирген. 2013 чылда керээзиниң хуусаазы төнерге, халашкан. 2014 чылдан эгелээш, ол-ла шериг кезээнге артиллерия дивизионунуң реактивтиг батареязының, реактивтиг артиллерия взводунуң санаашкынының машина командири кылдыр ажылдаан.
2015 чылда Тыва Республиканың Кызыл хоорайда 55115 дугаар шериг кезээнче шилчиттирип алган. 2018 чылда ол-ла шериг кезээнге хары угда 10 чылдың керээзин чарып алгаш, боду чоруур артиллерия взводунуң командири кылдыр ажылдап турган.
Шериг албан-хүлээлгезин күүседип турар үеде Сылдыс Күжүгет эвээш эвес шаңнал-макталды алган. 2016 чылда “Пальмирни хостааны дээш”, “Сирияның шериг операциязының киржикчизи” деп медальдарның эдилекчизи болган. 2022 чылда “Эрес-дидим чоруу дээш” деп медаль-биле база шаңнаткан. Оон аңгыда, 2018 чылда албан-хүлээлгезин үлегерлиг күүседип турары дээш ТР-ниң Баштыңының Хүндүлел бижии-биле ооң ажылын үнелээн. Тиилелге хүнүнде шериглерниң байырлыг чыскаалынга, Ада-чурттуң Улуг дайынының Тиилелгезиниң 75 чыл оюнга шериглер чыскаалынга киришкени дээш Дайынчы дем каттыштырылганы быжыктырганы база оон-даа хөй-хөй медальдарның эдилекчизи болган.
2022 чылдың январь айда шериг кезээниң командириниң дужаалы-биле Донецк болгаш Луганск республикаларның тайбың чурттакчыларын хостаары-биле Украинаның девискээринде болуп турар шериг операциязынче киржип чорупкан. 2023 чылдың февраль 12-де шериг албан-хүлээлгезин күүседип тургаш, маадырлыы-биле амы-тынындан чарылган.
Чыжыргана СААЯ.
Чуруктарны маадырның чоок кижилеринден алган.
«Шын» №27 2024 чылдың апрель 10
