ТР-НИҢ ХӨЙ-НИИТИ ПАЛАТАЗЫНДА
2024 чылдың сентябрь 8-те болур соңгулдаларга белеткел үезинде болгаш бадылаашкыннар хүнүнде хамаатыларның соңгуур болгаш соңгудар эрге-ажыктарын канчаар боттандырып турарын хайгаараар хөй-ниити штавын июнь 17-де Тыва Республиканың Хөй-ниити палатазының чанынга ажыткан.
Штабтың удуртукчузу Баян-Доржу Сат соңгулдалар үезинде хөй-ниити хайгааралдар чорударынга арга-дуржулгалыг удуртукчу. Россияның Президентизиниң соңгулдаларының үезинде Хөй-ниити хайгааралдар төвүнүң ажылын башкарып турган.
Хөй-ниити хайгаарал штавының иштики тургузуу организастаттынганын штабтың удуртукчузу Баян-Доржу Сат дыңнаткан. Ооң составынче республиканың хөй-ниити амыдыралынга идепкейлиг, соңгулдаларга хөй-ниити хайгааралдар ажылын чорударынга арга-дуржулгалыг кижилер кирген. Соңгулдаларга хөй-ниити хайгааралдар чорударынга волонтерларны немей хаара тударын, оларның өөредилгезин эрттирериниң дугайында штабтың хуралынга чугаалашкан.
Тыва Республиканың Соңгулда комиссиязының даргазы Л.С. Андалаева хөй-ниити хайгаарал штавының хуралынга киришкеш, Россия Федерациязының соңгулдалар дугайында хоойлужудулгазында өскерилгелер дугайында дыңнадыгны кылган.
Ш. МОНГУШ.
“Шын” № 45 2024 чылдың июнь 19
