Ажы-төлдүг өг-бүлелерге «Өг-бүле» национал төлевилел-биле регионда элээн каш деткимче хемчеглери боттанып турар. 2026 чылдан тура хөй ажы-төлдүг өг-бүлелерниң ниити билиг школаларында өөренип турар ажы-төлү хөй-ниити транспортунга халас чоруп болур. Ол деткимчени Тыва Республиканың девискээринге муниципалдыг маршруттарга чоруурунга, Кызыл хоорайга, хоорайжыттынган Каа-Хемге база Кызыл кожууннуң Сукпакка, чүгле такси хандырылгазын санаваска, ажыглап болур.
Чоруурда, саазын билет сатпас, чүгле уругга хамааржыр «Мир» национал төлевир системазының кандыг-даа банк картазын ажыглап болур. Ооң бир айда өйлеп каан нормазында (лимиди) 14 катап халас чоруурунуң өртээ кирип турар.
Ол деткимчени ажыглаар дээр болза, ада-иезиниң бирээзи азы хоойлу ёзугаар төлээзи чурттап турар чериниң аайы-биле чурттакчы чонга социал деткимче көргүзер органга баргаш, билдириишкинни киирер. Документиге өөренип турар уруунуң «Мир» банк картазының реквизиттерин албан айтыр. Билдириишкин киирерде, херек документилер: ада-иезиниң паспорту (хоойлу ёзугаар төлээзи); уруунуң төрүттүнген дугайында херечилели; өөредилге албан черинден өөренип турарын шынзыткан справка; хөй ажы-төлдүг өг-бүлениң эрге-байдалын бадыткап турар документ (информастыг системада медээзи чок болган таварылгада).
Социал камгалал органнарының специалистери билдириишкиннерни хынап көргеш, шиитпирни үндүрген соонда, уругга 12 ай хуусаалыг чиигелдени бээр, чүгле школага өөренип турар үезинден ашпас ужурлуг.
Немелде консультация алыксаар чурттакчылар Кызыл хоорайның мэриязының социал политика департаментизинче азы Кызыл кожууннуң күш-ажыл болгаш социал хөгжүлде эргелелинче барып болур. Ол ышкаш ТР-ниң Күш-ажыл болгаш социал политика яамызының Чат-бодун (max.ru/mintrudrtbot) таварыштыр социал деткимчелер дугайында тодаргай билип ап болур.
Бистиң корр.
Медээни болгаш чурукту ТР-ниң Күш-ажыл болгаш социал политика яамызының социал четкиде арнындан алган.
“Шын” № 12 2026 чылдың апрель 12