Кызыл хоорайның одаар чүүл складтарынга хөмүр-даш курлавырының эвээжээниниң, чамдык складтарда хөмүр-дашты сатпайн барганының дугайында хомудалдар чурттакчы чондан эрге-чагырга органнарынга кирген, социал четкилерде база көстүп келгилээн.
Хөмүр-даш-биле чурттакчы чонну хандырарын экижидер дээш, кандыг ажылдарны кылып чорудуп турарынга хамаарыштыр Тыва Республиканың Одаар чүүл болгаш энергетика сайыдының бирги оралакчызы Эдуард Куулар массалыг информация чепсектери дамчыштыр чонга тайылбырны берген.
Ооң чугаалааны-биле алырга, сөөлгү хүннерде агаар-бойдустуң сооп келгени-биле холбаштыр "Каа-Хем" хөмүр-даш уургайындан одаар чүүл садып алыр дээн хереглекчилерниң машина-балгады көвүдээн, Кызыл хоорайда болгаш чурттакчылыг черлерде одаар чүүл складтарынга хөмүр-дашты сөөртүп мөөңнээринге түр үениң бергедээшкиннери тургустунган. Ону кичээнгейге алгаш, "Каа-Хем" хөмүр-даш уургайындан чурттакчы чонга болгаш одаар чүүл складтарынга хөмүр-дашты мурнады чүдүрер, оларның автотранспортун уургайже кирер үезин 19 шакка чедир узадырының дугайында шиитпир хүлээп алдынган. Кызыл хоорайда болгаш чурттакчылыг черлерде одаар чүүл складтарынга хөмүр-дашты сөөртүп чедиреринге Чуртталга-коммунал ажыл-агый яамызының машина-техниказын база хаара туткан. Бо неделяның төнчүзүнге чедир одаар чүүл складтарынга чурттакчы чонга садар хөмүр-даштың курлавыры тургустунарын Эдуард Куулар дыңнаткан.
Ш. Монгуш.
Хөмүр-даш айтырыы
6 октября 2022
39