Хөмүр-даш айтырыынче кичээнгей

Тываның Баштыңы одалга сезонунуң чорудулгазын шыңгыы кичээнгейде алган. Кожуун, суурларда бо талазы-биле байдалды билип алыры-биле, хөмүр складтары болгаш чылыг хандырылгазының объектилеринге боду чедип, ында ажылдакчылар-биле ужуражып турар. Ол дугайында бөгүн Владислав Ховалыг социал четкилерде бодунуң арыннарынга бижээн.

“Хөмүр айтырыынга хамаарыштыр оперативтиг штабтың үндүрген шиитпиринге харыыны алдывыс. Деткимчеңер дээш шуптуңарга четтирдим! Хөй кижи “ТГРК” КХН-ге киирген санал-сүмеже кичээнгейни салган болду. А бир эвес Президентиниң Чалыын сактып кээр болзувусса, ында Россияның субъектилериниң удуртукчуларының – оперштабтарның баштыңчыларының шиитпирин ук регионнуң девискээринде турар эрге-чагырга органы азы албан организация-даа болза, күүседири албан дээн болгай. Ол дугайында документини Кремльдиң албан ёзу медээлериниң аразында салган.
Тываның барыын кожууннарынче сургакчылаашкын үезинде, Тыва даг-руда компаниязының Чадаана участогунда ажыл-агыйның технологтуг чорудуу-биле таныжып көрдүм. Бо чоокку хүннерде ТДРК-ның Каа-Хемде участогунга чедип, ында оперштабтың шиитпирин канчаар күүседип турарын бодум көөр дээн мен. Бир эвес бо хүннерде документилер көргүзерин негээн байдалдарга таварышкан болзуңарза, дыңнадып бижиирин дилээр-дир мен. Тываның Одалга болгаш энергетика яамызы бүгү санал-оналдарны, айтырыгларны демдеглеп ап турар, ол бүгү биске улай чугаалажыышкыннар кылырынга немелде материалдар болур. Хөмүр хандырылгазының айтырыы Улусчу фронтунуң регионалдыг күүскомунуң шыңгыы хыналдазында турар. Бистиң демниг күжениишкинивис хөмүр өртээн чогумчалыг чүгээр болдурарынче угланган.
ТДРК-ның участоктарындан хөмүр-дашты үндүр сөөртүр дугайында чугаалап тургаш, ону боттарывыстың талавыстан база тода организастап алырывыс чугула. Хүн бүрүде яамыларның удуртукчуларының илеткелдерин дыңнаарындан аңгыда, одалга сезонунуң кандыг чоруп турарын бодум хынап турар мен. Кайы-даа кожуунга четкенимде, бир дугаарында хөмүр складтарын, чылыдылга хандырылгазының объектилерин хынап көргеш, ында ажылдап турар ажылчыннар-биле чугааны чорудуп тур мен. Дүүн Хайыракан, Шагаан-Арыг, Чадаана, Чыраа-Бажы, Барлык, Кызыл-Мажалык болгаш Ак-Довуракка бардым. Ында ажылдап турар улустан бирги медээни дыңнап, билип алыры, меңээ чугула”.

#ВладиславХовалыг#ГлаваТувы