2023 чылдың сентябрь 1-ден «Хөмүр-даш продукциязы» КИС-че (күрүнениң информастыг системазы) бүрүткел эгелээн. «Хөмүр-даш продукциязы» КИС – одаар бажыңнарда чурттап турар хамаатыларга доктааткан хемчээл езугаар хөмүр-дашты өйлеп садар арга тургузар дээш чогааткан программа. Хөмүр-даш садып алыр бетинде чагыг кииреринге эптиг байдалдарны тургузуп, чонга одаар чүүлдү чедиштиреринге, складтарны хыналдага алырынга ажыктыг дээрзи билдингир.
Хөмүр-даш садыг-саарылгазын онлайн хевирже шилчиткен ужуру болза, чиижең чорукту болдурбазының бир аргазы. Онлайн хевир-биле хөмүр-дашты садып эгелээр болза, чиижең спекулянтыларның оруу муңгашталыр дээрзи билдингир.
«Мөөң акша-төгериктиг сайгарлыкчылар хууда хамаатының хөмүр-даш садып алыр, чиигелделиг өртээ-биле одаар чүүлдү тонна-тонназы-биле садып алгаш, аар өртекке садып-саарып турганын эрткен чылдың дуржулгазындан көрген бис. Ооң уржуундан хөмүр-даш чедишпестеп турган. Ынчангаш бөдүүн чонга эптиг байдалдарны тургузар дээш, чаа хевирниң программазын ажылдап кылганывыс бо» – деп, ТР-ниң одалга болгаш энергетика сайыды Эдуард Куулар демдеглээн.
Чаа ажылдап кылган программа езугаар хамааты бүрүзү бодунуң хереглээри хөмүр-дашты чиигелделиг өртек-биле садып алыр аргалыг апарган. А кожууннарда күрүнениң хөмүр-даш складтары бөдүүн чоннуң хереглелин хандырар сорулгалыг ажылдап турар.
«Хөмүр-даш» КИС-ке Госуслуги таварыштыр канчаар бүрүткедирил?
1. Дараазында айтыгже базыпкаш, (hrrps://сpgu.rtyva.ru/) азы QR-код-биле госуслугиже киргеш, ВОЙТИ деп бижикти базар.
2. Ооң соонда «ЗАЯВИТЕЛЬ» деп бижикти баскаш, улаштыр «КАРТОЧКА ДОМОВЛАДЕНИЯ» деп бижикти шилиир.
3. Ажыттынып келген арында «СОЗДАТЬ», оон «НАЧАТЬ» деп бижиктерни ээлчег езугаар базар.
4. Чаа арын ажыттынып келир. Долдурар ужурлуг хос одуругларны документ езугаар долдурар.
5. Бүрүткелче чагыгны ийи ажыл хүнүнүң дургузунда хынаан соонда, кабинедиңерге QR-код тыптып кээр. Хөмүр-даш складындан одаар чүүл садарда, ол QR-код-биле паспортуңарны көргүзүптер силер.
Бир эвес Госуслуги чок болза …
Дараазында айтыгже базыптыңар. https://cpgu.rtyva.ru/web/guest/Регистрация-в-системе
Ажыттынып келген арынны чурум езугаар долдуруп алыңар.
Бүрүткелче чагыгны ийи ажыл хүнүнүң дургузунда хынаан соонда, кабинедиңерге QR-код тыптып кээр. Хөмүр-даш складындан одаар чүүл садып алырда, ол QR-код-биле паспортуңарны көргүзүптер силер.
«Хөмүр-даш» КИС-ке тус черниң чагырга черин таварыштыр бүрүткедирде…
Адаанда кошкан бланк езугаар билдириишкиниңерни долдургаш, тус черниң чагыргазының электроннуг почтазынче чорудуптарыңарга, беш ажыл хүнүнүң дургузунда карточкаңар болу бээр.
Билдириишкинни долдурган соонда, чагырга черинден бодуңарның логиниңерни болгаш паролюңарны ап алыңар (электроннуг почта дамчыштыр-даа ап болур).
Беш ажыл хүнүнүң дургузунда хөмүр-даш садарының бүрүткели доостур. Госуслугиге QR-код көстүп кээр.
Билдинмес айтырыглар тургустунуп келзе, https://t.me/gissupport азы QR-код биле бир болза, Вайберде: clck.ru/35X8tx айтыгже базыпкаш, киргеш, бижиптер.
Айдың ОНДАР
№66 «Шын» 2023 чылдың сентябрь 6
