Тываның даг-руда компаниязы чурттакчы чонга хөмүр-дашты чиигелделиг өртекке садып турар, а ону күрүнениң «Хөмүр-даш продукциязы” медеглел системазының QR-коду чокка садып алыр күзелдиг организацияларга хөмүрнү рынок өртээ-биле садар. Удавас хөмүр-дашты керээ чокка садып ап болур апаар. Компания чогуур дужаалды ажылдап кылып эгелээн.
“Хөмүрнүң чүдүрүлге-чедирилгезинге контрольду тургузары-биле Тываның даг-руда компаниязы болгаш ТР-ниң Чазаа ону күрүнениң «Хөмүр-даш продукциязы” медеглел системазының программазынга бүрүткел чокка садып ап турар хереглекчилерге хөмүрнү саарылгалыг өртек-биле садып-сайгарар болуп дугурушканнар” деп, хөмүр-даш компаниязында үндезин-дөс дыңнадып турар.
Республиканың Одалга болгаш энергетика яамызының бергени дыңнадыгдан алырга, күрүнениң «Хөмүр-даш продукциязы” медеглел системазында 10 муң ажыг өреге бүрүткеттинген. QR-кодту болгаш паспортту көргүскенде, уургайдан одаар чүүлдү бир тоннада 2619 рубль чиигеткен өртек-биле садар. Чиигеткен өртектиг хөмүрнү одаар чүүл шыгжамырларында сайгарып турар. Ол черлерде оттулар чүүлдүң өртээнге транспорт немелдезин база кадып турар.
Хөмүрнү QR-код чокка база саарылгалыг сорулгаларга улуг хемчээлдиг садып ап турар кижилерге болгаш юридиктиг организацияларга ону долу өртек-биле садар. Чиигелде чок хөмүрнүң өртээ 3,5 муң рубль ажыг. Тываның даг-руда компаниязы хамаарышкан дужаалды үндүрген соонда, компания-биле ыяап-ла керээ чарар база шилчиткен акша-биле санажыр ажыы чок апаар. Туда санажылганы база хүлээп ап эгелээр.
А. ХЕРТЕК белеткээн.