Эрткен неделяда чурттакчы чон "Хөмүр-даш продукциязы" күрүнениң информастыг системазының (КИС) ажылынга хамаарыштыр хомудалдарны киирген – хөмүр садып алырынга чугула херек QR-кодту бүрүткедип алыр дээрге, система ажылдавайн турарын дыңнаткан.
Республиканың Одалга болгаш энергетика яамызы чурттакчы чонга таарымчалыг кылдыр системаны чаартып турганындан, түр үеде ынаар киртинмейн турганын тайылбырлаан. Ам QR-кодту боттары бүрүткедип, ону алыры, чүгле каш минутаның ажылы апарган.
Чондан айтырыгларның көвей кезии эрткен чылгы QR-коду-биле хөмүр садып ап болур бе, ону чидирип алган, азы оозу чок болза, канчаарыл деп айтырыглар келген. "Хөмүр-даш продукциязы" КИС-ти чаарткан соонда, эрткен чылдың куар-кодтары база чаарттынган, ынчангаш бүрүткелдиг хамаатылар чаа кодун алыр дизе, системаже кирерин яамы тайылбырлаан.
Канчаар бүрүткедирил база QR-кодту алыры
Системага бүрүткетпээн кижилер https://cpgu.rtyva.ru шөлүгже киргеш, ону кылдырып ап болур. Шөлүгже кире бергеш, тайылбыр езугаар операцияны кылыр. Бир эвес бергедежип турар болзуңарза, Чаңгыс аай тайылбыр албанының 8(39422)5-15-49 дугаарлыг телефонунче долгаар. Системага бүрүткеткеш, хуу кабинединге бажыңын айтып, немээн соонда, бодунуң адрезинче баскаш, QR-кодун алыр. Тодаргай бажыңның шөлүнге санаан херек тонназын айыткан кодту алыр. Бо-ла шөлүгден чаарттынган QR-кодту катап база хуу кабинет таварыштыр ап болур.
Системага бүрүткедири база QR-кодту алыры
Бир эвес системага боттары бүрүткедип азы QR-кодун киирип шыдавас болза, чурттап турар чериниң аайы-биле муниципалитеттиң чагыргазында МФЦ-ден, ол ышкаш Тываның Одалга болгаш энергетика яамызының дараазында дугаарлыг телефоннарындан
8(39422)5-16-86, 8(39422)5-15-49 дузаны дилеп болур.
QR-код чокка хөмүрнү садып алыры
"Хөмүр-даш продукциязы" күрүнениң информастыг системазында ооң мурнунда бүрүткеткен хамаатылар QR-код чокка, паспортун база СНИЛС-ин көргүскеш, Каа-Хем азы Чадаана хөмүр уургайларында күрүнениң болгаш хуу складтарындан хөмүрнү садып ап болурун Тываның Одалга болгаш энергетика яамызы сагындырган.
хөмүрнү кайыын садып алырыл
Бөгүнде "Хөмүр-даш продукциязы" күрүнениң информастыг системазында республиканың 64 муң хире өрегези бүрүткеткен, 44,5 муң ажыг тонна хөмүрнү садып алган. Тываның 16 кожуунунда ажыглалда деңзилерлиг 36 одаар чүүл складтары ажылдап турар. Тыва Республиканың Чазааның 2023 чылдың декабрь 29-та №970 доктаалы-биле бадылааны өртек-үнелиг хөмүрнү Каа-Хем уургайының чанында чүгле чаңгыс күрүне склады садып турар, чон дыка дүрген садып апаарындан бөгүн ында одаар чүүл чок.
Амгы үеде хуу сайгарлыкчылар 23 хөмүр складын хандырып турар, «ТСП» КУБ-та 13 күрүне склады бар. Чурттакчы чон хуу хөмүр складтарында одаар чүүлдүң чогун дараазында дугаарларже дыңнадып болур - 8(39422) 5-15-49, 8(39422)5-16-86, а күрүне складтарында байдалды 8(39422) 2-03-53 дугаар хүлээп ап турар.
Складтарда хөмүр-даштың өртек-үнези
"Хөмүр-даш продукциязы" күрүнениң информастыг системазындан Тываның шупту хоорайларында болгаш кожууннарында хөмүрнүң өртек-үнезин көөр дизе, https://cpgu.rtyva.ru сайтыда интерактивтиг картада муниципалитеттиң ылгавыр демдээнче базар. Картада складтың азы уургайның адын, ооң адрезин, ажылының графигин, бар хөмүрнүң марказын база тоннада өртээн, складта чеже тонна одаар чүүл барын айтып каан болур.
Каа-Хем биле Чадаана хөмүр уургайларында чурттакчы чонга бир тонна хөмүрнүң өртээ QR-код-биле 2765 рубль, а складтар хөмүр бүдүрүлгезинден чурттакчылыг черниң ыраан көрүп, хөмүр сөөртүп-чедиргениниң чарыгдалын кадып, өртекти немеп алырлар. Чижээ, Каа-Хем суурнуң Мелиораторлар кудумчузунда хуу сайгарлыкчы Монгуш А.С.-тиң одаар чүүл складында бир тонна хөмүрнүң өртээ – 3155 рубль.
А.МОНГУШ.
Чурукту интернет четкизинден хоолгалаан.
«Шын» №93 2024 чылдың декабрь 4
