Дандар-оол Биче-оолович Донгак 1972 чылда башкыларның Август чөвүлел хуралы болуп турда, суй белек албышаан, диңмиттиг адыш часкаашкыннары-биле кады баштайгы базымын эгелээн.
Оон бээр-ле Мугур-Аксының 1 дугаар ниити билиг ортумак школазынга үзүктел чокка 52 чыл ажылдаан. Ооң күш-ажыл дептеринде чүгле чаңгыс демдеглел бижик бар. Тодаргайлаарга, 1972 чылдың август 15-те Мугур-Аксы школазынга химия, биология башкызынга хүлээп алганын демдеглей бижээн. Ол амдыгаа чедир ук школада ажылдавышаан.
Башкының нарын, берге, чымыштыг ажылы ынчаар-ла уламчылап чоруур. Ол 2024 чылдың август 5-те 80 харлаан. Узун назылыг башкы амгы үеде Мугур-Аксы ортумак школазының немелде өөредилге төвүнде фото-чурук клувун удуртуп, уругларга чурук тырттырарын өөредип турар.
Дандар-оол Донгактың өскелерден ылгалып чоруур кол-ла шынарлары — башкы эртеминге бердингени база быжыг кадыкшылы. Башкыны көөрге, эртениң-не сула шимчээшкиннер кылып, маңнап чоруур. Ооң кадык чоруунуң база бир чылдагааны – ол кажан-даа таакпылавас, арага ишпес. Ооң ол үлегерин өөреникчилери, ооң-биле кады ажылдап чоруур башкылар болгаш чоок төрел-дөргүлү өттүнүп, үнелеп чоруурлар.
Башкы кижиниң ажылының түңнелдери ооң өөреникчилери болур. Дандар-оол Донгак 1972 чылда ынчангы Кызылдың башкы институдунуң биология, химия факультедин дооскан. Ооң өөреникчилериниң аразында кандыг-даа мергежилдиң кижилери бар.
Ол башкы эртемин чедип алган өөреникчилери-биле кады ажылдап чоруур. Ооң база бир өөреникчизи Аржаана Борисовна Демиржаан школаның директору болуп чоруурунга башкы аажок чоргаарланыр. Оон ыңай башкының өөреникчилери Чейнеш Николаевна Ооржак Кызыл хоорайда Тыва Республиканың өөредилге төвүнде химия эртеминиң методизи болуп ажылдап турар. База бир өөреникчизи Аяна Олеговна Ондар биология эртемнериниң кандидады.
Шак ынчаар хоочун башкы башкыларның башкызы апарган. Дандар-оол Биче-оолович Донгактың ажылын төрээн школазы, кожууну, республиказы бедии-биле үнелээн. Ол “РФ-тиң Улус өөредилгезиниң тергиини” хөрек демдээниң, ТР-ниң тургустунганындан бээр 100 чыл ою медальдың эдилекчизи, хөй-хөй хүндүлел бижиктерниң эдилекчизи. “Мөңгүн-Тайга кожууннуң хүндүлүг башкызы” деп атты база эдилеп чоруур. Сезен харлыг башкы ам-даа чиик, сергек, башкыларның Август чөвүлел хуралынга 52 дугаар чыл киржири-биле белеткенип турар.
Хүндүлүг башкыга 80 харлаан юбилейи-биле узун назынны, быжыг кадыкшылды, аас-кежикти күзеп артым.
Сарыг-оол ДОНГАК, хоочун башкы.
“Шын” №63 2024 чылдың август 21
