Тиилелге дээш, Төрээн чуртунга амыр-тайбыӊны болгаш хамаарышпас чорукту белек кылдыр сөӊнээни дээш, Ада-чурттуӊ Улуг дайыныныӊ маадырларын хүндүткеп, оларга күдүк базып мөгейип чоруур бис.
Ёзулуг мөзү-шынарныӊ уг-шиин айтып чоруур адаларывыстыӊ болгаш кырган-ачаларывыстыӊ өндүр улуг маадырлыг чоруунга төлептиг болуру бистиӊ ыдыктыг хүлээлгевис-тир. Оларныӊ эрес-дидим, бодун хайыралавас чоруунуӊ, чаныш-сыныш чок күчү-шыдалыныӊ үлегери салгалдарга төлептиг көскү үлегер болуп чоруур.
2023 чыл бистиӊ республикавыска онзагай чыл болуп турар. Тыва Арат Республика 80 чыл бурунгаар Кызыл Шеригниӊ одуруунга туруп алгаш, фашистер-биле демисежир дээш, фронтуже эки туразы-биле чоруур дээн оолдарын, уругларын үдээн. Удавас сентябрь айда шак ол төөгүлүг болгаш тураскаалдыг хүннүӊ 80 чыл оюн демдеглээр бис. Чурттун камгалаар дээш, дыка хөй улус маадырлыы-биле мөчээн.
Ада-чурттуӊ Улуг дайыныныӊ маадырларыныӊ эрес-дидим чоруунга чоргаарланып, Тыва Арат Республикадан фронтуже чоруй барган шупту ада-өгбелеривистиӊ дугайында ыдыктыг сактыышкынны үнелеп, хүндүлеп чоруур бис. Тываныӊ дайынчы алдарыныӊ төөгүлүг бижимелин амгы үеде Ада-чурттуӊ камгалакчылары уламчылап турар. Олар ат-алдары тоолчаан тыва эки турачыларныӊ төлептиг салгакчылары болуп чоруур.
Бистиӊ хөй нацияларлыг чонувустуӊ демниг, эрес-дидим, дайынчы соруу болгаш российжи шериглерниӊ профессионализми делегейниӊ чаа кыйгырыгларынга удур туржур, бистиӊ Төрээн чуртувустуӊ эрге-ажыктарын камгалаар арганы берип турар.
Улуг Тиилелге хүнү-биле, эргим чаӊгыс чер чурттугларым! Силер бүгүдеге амыр-тайбыӊны болгаш чаагай чорукту йөрээп күзедим!
Хүндүткел-биле,
Тыва Республиканыӊ Баштыӊы В.Т. ХОВАЛЫГ.
"Шын" №33 2023 чылдың май 6
