Кызылда Тубтен Шедруб Линг хүрээде уруг-дарыгның буддийжи өөредилге төвү февраль 1-де ажыттынган. Ону ажытканының кол сорулгазы – ачы-буянныг сагыш-сеткил, ачылыг-чаагай чуртталга дугайында билиишкиннерни өзүп орар салгалдың угаан-медерелинге сиңирип сайзырадыры. Бо төптү Тыва Республиканың Чазааның болгаш Күжүгет Шойгу аттыг культура фондузунуң деткимчези-биле ажыткан.
Республиканың Өөредилге яамызы-биле кады бо төптүң өөредилге программазын ажылдап кылыр. Ол программа ёзугаар ажы-төл чүгле буддизмниң билиглерин шиңгээдип алыр эвес, Тываның болгаш ооң чонунуң төөгүзүн, культуразын база өөренир. Тубтен Шедруб Линг хүрээде сарыг шажын өөредилге төвүнге өөредилгениң утка-шынарын улам ханыладыр болгаш нептередири-биле ол программаны делгередир ажылдап кылыр.
Күжүгет Шойгу аттыг культура фондузунуң баштаар чериниң даргазы Ирина Шойгу, Буддисчи өөредилгеге болгаш шинчилелдерге деткимче фондузунуң даргазының оралакчызы Олег Вавилов төпке бүгү талазы-биле дузалаарынга беленин дыңнатканнар.
“Бир дугаар мындыг школа ажыттынып турары бо. Аңаа чүгле сарыг шажынның дүрүмнерин өөредир эвес, сагыш-сеткил болгаш угаан-медерел өөредиин база чорудар. Лама башкылар буянныг болгаш шыдамык чорук, ынакшылдыг болгаш кээргээчел болурунуң дугайында чугаалажыр. Ол ышкаш оларга республикавыстың төөгүзү, кижилериниң дугайында база чоннуң культуразы чүнү көргүзүп турарыл дээн ышкаш чугааларны уруглар-биле чорудар. Дараазында бистиң өөредилгевистиң программазы оон-даа сайзыраар, өөреникчилеривиске хөй билиг бээри-биле өскерлип турар боор. Бо программаның ам-даа сайзыраарын база өске-даа хүрээлерге моон-даа соңгаар мындыг школалар ажыттынарын күзээр-дир мен” — деп, Ирина Шойгу чугаалаан.
Буддисчи өөредилгеге болгаш шинчилелдерге деткимче фондузунуң даргазының оралакчызы Олег Вавилов мындыг школаларны ажыдары чурттуң келир үезинге үнелиг салыышкын-дыр дээрзин чугаалаан: “Ук школаны ажытканы — келир үеже база бир салыышкын-дыр. Келир үеде Россия Федерациязынга болгаш республикага база бир лидерлер оон үнер. Бо школага сарыг шажынның бурун езу-чаңчылдарын, Тываның культуразын амгы үениң өөредилгезиниң методтары-биле каттыштырары өске регионнарга база солун болур деп бодаар мен. Ынчангаш бо төлевилел чедиишкинниг болзун дээш, сарыг шажынның өөредилгезиниң хөгжүлдезинге боттарывыстың талавыстан деткимчени көргүзеринге белен бис”.
Тываның Камбы-ламазы Гелек Нацык-Доржу Тубтен Шедруб Линг хүрээде уруг-дарыгның сарыг шажын өөредилге төвүн ажыдарынга дузалаан деткикчилерниң шуптузунга өөрүп четтиргенин илереткен.
Февраль 1-де сарыг шажын өөредилге төвүнүң хуурактарының баштайгы кичээлдери эрткен. Ол кичээлдер неделя санында субботада болур.
Бистиң корр.
Ада ТЮЛЮШТУҢ тырттырган чуруктары.
«Шын» №4 2025 чылдың февраль 6
