Хүреш чурумун шыңгыыраткан

Тыва спортчуларның допинг ажыглааны дээш квалификациязын казыттырар таварылгаларның көвүдээни-биле, ТР-ниң Спорт яамызы тыва национал хүреш маргылдааларын эрттирер чурумун май айның турнирлеринден эгелеп шыңгыырадыр шиитпирни хүлээп алган.

2023 чылдың май 1-ге чедир национал хүреш маргылдаазынга киржир спортчу бүрүзү дараазында документини – “Антидопинг” дугайында өөредилгени эрткен дугайында бадыткап турар РУСАДА-даның сертификадының хоолгазын көргүзери албан.

Апрель 18-те “Тыва” спорт школага ажылчы хурал болуп эрткен. Аңаа Национал хүреш федерациязының президентизи Аяс Монгуштуң киржилгези-биле тыва спортчуларның допингиге хамаарышкан культуразының дугайында чугаалашкан. Ол хуралдың түңнели-биле Федерация маргылдааны организастап тургаш, сертификат чок кижини хүрештирбес деп шиитпирлээн. Шак ол негелде шупту спортчуларга хамааржыр, мөгелерниң хар-назыны, алдар-адындан хамаарышпас болур.

Бир эвес онлайн-курсту боду эрткеш, сертификат алыр күзелдиг улус бар болза, бо айтыгже киргеш, билип ап болур: https://course.rusada.ru/

Ооң бетинде, спортчулар хууда кабинединче киргеш, антидопинг дугайында өөредилге материалын дыңнап алгаш, 10 айтырыгга харыылаар. Эки болур болза, 2023 чылдың төнчүзүнге чедир күштүг сертификатты алыр.

ТР-ниң Спорт яамызының медээзи