Совет Тываның 5 чылы аттыг стадионга Наадым–2024 байырлалының баштайгы хемчеглериниң бирээзи – чылдың-на болуп эртер 18 хар чедир элээди оолдар хүрежи болуп эрткен. Ниитизи-биле 143 элээди мөге киришкен.
Мөгелер чыскаалын Тываның Спорт школазының хүреш тренери Начын Монгуш баштаан.
Тыва чоннуң база бир кайгамчык оюннарының бирээзи болур хүреш маргылдаазын көөрү-биле улуг-биче чон хөйү-биле чыглып келген.
Ук маргылдааның түңнелинде национал хүреш спортунуң келир үеде "сылдыстарының" аттары билдинип келир дээрзин Республиканың консультация-диагностиктиг төвүнүң улуг эмчизи, “Чаңгыс демниг Россия” партиязының кежигүнү Долаан Калбак демдеглээн.
“Хүреш – хөй-ле ийи кижи тутчур спортчу оюннарның үндезини. Бистиң спортчуларывыс республикадан дашкаар хүрештерниң янзы-бүрү хевирлеринге шылгараңгай түңнелдерни чедип ап турарлар. Хүреш дээрге шаандагы-ла спортчу ёзу-чаңчыл-дыр. Хүрежип чоруур мөге кижи бүрүзү бодунуң чонунуң культуразын кадагалап арттырып, келир салгалга улаштыр дамчыдып берип чоруур. Эмчи кижи болганымда маргылдааның бүгү-ле киржикчилеринге, мээң чаңгыс чер чурттугларымга быжыг кадыкшылды, чедиишкиннерни узун назынны күзедим” – деп, Ыяап-ла медицина камгаладылгазының (ЫМК) фондузунуң директору, “Чаңгыс демниг Россия” партиязының кежигүнү Шолбан Күжүгет демдеглээн.
Эрткен чылын элээди оолдар аразынга маргылдаа 3,5 шак дургузунда үргүлчүлээн. Ачыр-дачыр тудушканының түңнелинде Эрзин кожууннуң төлээзи Сүгдер Намчаа тиилекчи болган. Ийиги черни Чөөн-Хемчик кожууннуң чалыы мөгези Айслан Самбый-оол алган. Үшкү, дөрткү черлерни Улуг-Хемден Бады-Чимит Доржу, Чөөн-Хемчиктен Гендун Монгуш үлешкеннер.
Ынчан Наадым байырлалының элээди оолдар аразынга национал хүрештиң бирги чери дээш маргылдаага 128 мөге киришкен.
Аныяк мөгелерге акша сертификаттарын болгаш “Чараш арга” дээн ышкаш тускай шаңналдарны тыпсыр.
Ч. СААЯ белеткээн.
Буян ООРЖАКТЫҢ тырттырган чуруктары.
"Шын" №54 2024 чылдың июль 20
