Тываның Чазак бажыңынга Онза байдалдар чайладыр чаңгыс аай күрүне системазы девискээр аайы-биле тус-тузунда ажыл-агыйын түңнээн. Эрге-чагырганың, яамыларының, ведомстволарының төлээлери болгаш кожууннар удуртукчулары хемчегге киришкен.
Чыл дургузунда республикага болган хай-халаптар-биле демисел ажылының түңнелдери болгаш келир чылдың планын Россияның Онза байдалдар яамызының Тывада кол эргелелиниң начальнигиниң оралакчызы Валерий Шыырап илеткээн.
“Бо чылын республиканың девискээринге 215 арга-арыг өрттери бүрүткеттинген. Эң нарын байдал Таңды кожуунга тургустунган. Улуг чалбыыштарлыг өрт чурттакчылыг черлерже шилчий берип болур айыыл тургустунган” – деп, Валерий Шыырап дыңнаткан.
Бо чылын регионга ниитизи-биле 1029 өрт болган. Айыыл-халаптың түңнелинде 13 кижи амы-тынындан чарылган. 2023 чылга деңнээрге, 59 өрт эвээш болган, чок болган кижилерниң саны 31 хуу кызырылган.
“Шагаан-Арыгның ЧЭТ-ке болган частыышкынынга Федералдыг төп болгаш кожа-хелбээ чыдар регионнар-биле кады ажылдажылганың түңнелинде, когарал чүгээр болган деп демдеглексеп тур мен” – деп, ол немээн.
Чазак Даргазының оралакчызының хүлээлгезин күүседип турар Айдыс Сынаа база шупту тургузугларның демниг ажылдажылгазының ачызында Шагаан-Арыгга хай-халаптың уржуу өршээлдиг болганын онзалаан.
“Ук онза байдалды чайладырынга үлүг-хуузун киирген кижилерге четтиргеним илереттим. Сибирь Федералдыг округтуң регионнарының болгаш Тывада ОБЯ-ның кол эргелелиниң бедик ажылының түңнели-дир. Ниитизи-биле 300 кижи болгаш 78 янзы-бүрү тудуг техниказы хаара туттунган” – деп, Айдыс Сынаа ылавылап демдеглээн.
Хуралдың ийи дугаар кезээнге келир чылдың планнары-биле хемчегниң киржикчилерин таныштырган. Күрүнениң шупту тургузуглары-биле ажыл-чорудулганы ам-даа быжыглаары болгаш айыыл-халап болдурбазы-биле, баш удур шиитпирлээр хемчеглерни ам-даа күштелдирерин онзалап демдеглээн.
Арынны Олча СААЯ белеткээн.
Буян ООРЖАКТЫҢ тырттырган чуруктары.
“Шын” №98 2024 чылдың декабрь 21
