Соңгулдалар бүдүүзүнде Кызылга видеохайгааралдың камераларын дамчыштыр хөй-ниитиниң талазындан соңгулдаларны хайгаараар тускай төп ажыттынган турган.
Ниитизи-биле 68 соңгулда участогунда 153 хамаарышпас хайгааракчы ажылдап турар. Бүгү участок соңгулда комиссияларында видеохайгааралдың камералары дүн-хүн чокка ажылдап турарлар.
Эдерти шинчилээр база хамаатыларның соңгулда эргелериниң контролюнуң талазы-биле хөй-ниити штавының даргазы Светлана Ощепкованың чугаалап турары-биле алырга, соңгулдаларның бирги хүнүнден тура бо үеге чедир кандыг-даа хажыдыышкын барымдааларын хайгааракчылар илеретпээн болуп турар.
«Хөй-ниити хайгааракчыларының беш чыл ажылының дургузунда хоойлужудулгаже эң-не баштайгы өскерилгелерни киирген. Бо чылын девискээр соңгулда комиссияларында хамаарылга чок деп адаттынар хайгааракчылар ажылдап эгелээн. Кижи бүрүзү ажылчын туруштуг, бодунуң хүлээлгелерин хөлчок эки билир, аңаа ак сеткилдиг хамаарылгалыг, ынчангаш бо хүннүң дургузунда девискээр соңгулда комиссияларының ажылында каракка илдигер хажыдыышкыннар илереттинмээн” - деп, С. Ощепкова чугаалап турар.
Хоорайның участок соңгулда комиссияларындан аңгыда, Видеохайгаарал төвүнүң кежигүннери соңгулдалар эртип турар кожууннарже база үнүп турар.
Видеохайгаарал төвүнде изиг шугумнуң телефону база ажылдап турар, ону дамчыштыр соңгукчулар дуза дилеп болурлар. Шак ынчаар, дүүн дуза дилээн дөрт дыңнадыг келген, бодунуң салган айтырыынга долу тайылбырны соңгукчулар алганнар.
Бистиң корр.
Ада Тюлюштуң тырттырган чуруктары.
